УИХ-ын намрын чуулган хаалтаа хийж улс төрийн сенсац, мэдээ мэдээлэл нам гүм байна. Гэхдээ өнгөн дээрээ чуулган хаалттай харагдавч, улс төрийн томилгоо, сандал суудлын төлөөх тэмцэлдээн ид өрнөж, ээлжит нэгэн том даргыг солих асуудал улс төрд яригдаж эхэллээ.
Өнгөрсөн амралтын өдөр Нийслэлийн есөн дүүргийн татварын газрын дарга нар Нийслэлээс 70 сая төгрөгийн зардал гаргаж, Дубай явсан мэдээлэл олны анхаарлыг татсан юм. ХУД-ын Татварын хэлтсийн дарга Г.Сүрэнтамжид, СБД-ийн Татварын хэлтсийн дарга Б.Баатар, БГД-ийн татварын хэлтсийн дарга М.Ганжигүүр, Багахангай дүүргийн ТХ-ийн дарга Х.Анхбаяр, СХД-ийн ТХ-ийн дарга Б.Энхтогтох, ЧДТХ-ийн дарга Н.Туул, Налайх дүүргийн ТХ-ийн дарга Ц.Алтанцоож, БЗД-ийн ТХ-ийн дарга Э.Энх-Очир гэх эдгээр найман хүнд Нийслэлийн татварын газрын дарга М.Болдбаатар чөлөө олгож хамтдаа Дубай явж ирсэн аж. Эдгээр Дубай явсан хүмүүс нэгдүгээр сарын 10-ны өдөр Монголд газардахад, зарим хэвлэлийнхэн угтаж, яриа авсан билээ. Энэхүү мэдээллийг анх Сангийн сайд Б.Жавхлан цахим сүлжээнд гаргасан юм. Удалгүй Ерөнхий сайд Г.Занданшатар Нийслэлийн татварын газрын дарга нарыг ажлаас нь чөлөөлөхийг үүрэгдсэн. Ийм үйл явдлын цаана Сангийн сайд Б.Жавхлан энэхүү мэдээллийг албаар гаргаж, Хотын даргыг унагаахаар Нийслэлийн гар хөл болсон хурган дарга нар болох Татварын хэлтсийн дарга нарыг чөлөөлөх улс төрийн нүүдэл байж болзошгүй гэж олон хүмүүс таамаглаж байна.
Тэгвэл Х.Нямбаатарыг цагаан сарын өмнө эсвэл дараа нь Хотын даргын суудлаас нь буулгаж, оронд нь томилогдож магадгүй хоёр кандидатын нэр гарчээ. Нэг нь Хот байгуулалт, барилга, орон сууцжуулалтын сайд Э.Бат-Амгалан нөгөөх нь МАН-ын Ерөнхий нарийн бичгийн дарга Я.Содбаатар нар юм. Ерөнхийлөгч У.Хүрэлсүх 2021 онд тангараг өргөсний дараа хамгийн анхны зарлигаараа Тамгын газрын даргаараа Я.Содбаатарыг томилж байсан юм. Иймээс түүнийг Ерөнхийлөгч У.Хүрэлсүхийн үнэнч түшмэл хэмээн цоллодог болсон. Гэхдээ түүнийг Хотын дарга болохоос илүү Нийслэлийн МАН-ын дарга болох хүсэлтэй гэж зарим нь жиг жуг хийдэг. Харин сайд Э.Бат-Амгалан нь одоо Ерөнхий сайд Г.Занданшатарын Засгийн газарт хүчин зүтгэж байгаа ч өмнөх хотын дарга Д.Сумъяабазар, Х.Нямбаатар нарын фракцын найзууд юм. Ямартай ч дараагийн Хотын даргад энэ хоёр хүн яригдаж байна. Улсын төсвөөс дутуугүй хэдэн их наядын мөнгийг жил бүр захиран зарцуулдаг Хотын даргын томоохон суудалд цаашид хэний нэр яригдах нь тодорхойгүй юм.
Сэтгэгдэл (2)