Азийн боксын шилдгүүдийг нэг дор цуглуулах “Улаанбаатар-2026” насанд хүрэгчдийн аварга шалгаруулах тэмцээн Монгол Улсын нийслэл Улаанбаатар хотын “Аса арена”-д эхэллээ.
12 өдөр үргэлжлэх тус тэмцээнд Хятад, Тайланд, Япон, Солонгос, Казахстан, Узбекистан, Энэтхэг тэргүүтэй 25 орны 300 орчим тамирчин оролцож байна. Монгол Улсын шигшээ багийн бүрэлдэхүүнд эрэгтэйчүүдийн 50 кг-д А.Баттулга, 55 кг-д Х.Билгүүнсайхан, 60 кг-д Б.Буяндалай, 65 кг-д Т.Энхтөр, 70 кг-д О.Бямба-Эрдэнэ, 75 кг-д Г.Далай, 85 кг-д Д.Барихаан, -90 кг-д Г.Энхсанаа, +90 кг-д Х.Бекнур нар өрсөлдөнө. Эмэгтэйчүүдээс 48 кг-д Э.Намуундарь, 51 кг-д Б.Мөнгөнсаран, 54 кг-д М.Энхжаргал, 57 кг-д Т.Номин-эрдэнэ, 60 кг-д М.Намуун, 65 кг-д М.Цэцэгдарь нар оролцохоор болжээ.
Тэмцээний эхний өдөр 13 хос тулаан болох бөгөөд манай улсаас 70 кг-д олон улсын хэмжээний мастер О.Бямба-Эрдэнэ эхний тулаандаа Филиппиний боксчин Норлан Петечиог шүүгчдийн санал нэгтэй шийдвэрээр 5:0-ээр яллаа. ААШТ-ий нээлтийн ёслол “Аса арена”-д өнөөдөр 18:00 цагт болно.
Ташрамд дурдахад, Монголд өмнө нь 2007 онд эрэгтэйчүүдийн, 2012 онд эмэгтэйчүүдийн ААШТ болж байсан бол анх удаа хамтад нь хүлээн авч байна.
Сэтгэгдэл (0)
Сэтгэгдэл бичигдээгүй байна