АНУ, Израилийн явуулсан байлдааны ажиллагааны хариуд Ираны зэвсэгт хүчин Ойрх Дорнод даяарх АНУ-ын цэргийн баазууд болон тэдгээр байрладаг улс орнуудад агаарын цохилт өгсөн талаар мэдээллүүд гарч байна.
Арабын Нэгдсэн Эмират Улс
Дубай хотод байрлах Fairmont The Palm тансаг зэрэглэлийн зочид буудал халдлагад өртөж, гал гарсан байна. Хотын эрх баригчдын мэдээлснээр дөрвөн хүн шархадсан ч галыг хяналтдаа авчээ.
Мөн нийслэл Абу Даби хотод устгагдсан нисгэгчгүй онгоц орон сууцны барилгын дээрээс унасны улмаас материаллаг хохирол учирч, нэг иргэн амиа алдсан талаар албаныхан мэдээлсэн байна.
Катар
Ойрх Дорнод дахь АНУ-ын хамгийн том цэргийн бааз болох Аль-Удейд агаарын бааз-ыг чиглэсэн хэд хэдэн пуужинг аюулгүй болгосныг Катарын Батлан хамгаалах яам мэдэгджээ.
Бахрейн
Нийслэл Манама хотод байрлах АНУ-ын Тэнгисийн цэргийн хүчний Тавдугаар флотын төв байр орчимд гал гарч буй дүрс бичлэгүүд олон нийтийн сүлжээнд тарсан байна. Гэвч хохирлын талаар АНУ-ын тал албан ёсны мэдээлэл хараахан өгөөгүй байна.
Мөн Кувейт, Йордан зэрэг улсууд Ираны пуужингийн халдлагад өртсөн гэх мэдээлэл гарчээ.
Нөхцөл байдал цаашид хэрхэн өрнөх нь тодорхойгүй байгаа бөгөөд бүс нутгийн аюулгүй байдалд ноцтой нөлөө үзүүлэх эрсдэлтэй хэвээр байна.
Сэтгэгдэл (0)
Сэтгэгдэл бичигдээгүй байна