ОХУ-ын Ерөнхийлөгч Владимир Путиний Хөрөнгө оруулалтын элч Кирилл Дмитриев, АНУ-ын Ерөнхийлөгч Доналд Трампын Ойрх дорнодын асуудлаарх тусгай элч Стив Виткоф Вашингтонд уулзсан байна. Трампын захиргааны алба хаагчид ОХУ-ыг Украинд гал зогсоох тохиролцоог зөвшөөрүүлэхээр шахалт үзүүлэн ажиллаж байгаа.
Стэнфордыг төгсөж, “Goldman Sachs”-д хөрөнгө оруулалтын банкирээр ажиллаж байсан Дмитриев бол Трампын багийн зарим гол гишүүдтэй ойрын харилцаатай, ОХУ-ын албан тушаалтнуудаас АНУ-ыг хамгийн сайн мэдэх нэгэн. Тэрбээр 2022 онд Украины дайн эхэлснээс хойш АНУ-д айлчилсан ОХУ-ын төрийн хамгийн өндөр албан тушаалтан болов. Дмитриев АНУ-ын албан тушаалтнуудтай юу хэлэлцсэн нь одоогоор тодорхойгүй байна. Тэр Трамп Путинд их уурлаж буйгаа илэрхийлж, ОХУ-аас газрын тос авдаг орнуудад тариф тавина гэж мэдэгдсэнээс хэдэн хоногийн дараа айлчлав.
Виткоф бол Украины дайны хэлэлцээнд гол үүрэг гүйцэтгэгч болсон албан тушаалтан. Тэр Дмитриевийг АНУ-д айлчлахыг өнгөрсөн долоо хоногт урьсан юм. Цагаан ордон Дмитриевт тус улсад зочлох богино хугацааны зөвшөөрөл олгохыг АНУ-ын Төрийн департаментад даалгасан аж. Учир нь Дмитриевт АНУ хориг арга хэмжээ авсан байгаа.
Сэтгэгдэл (0)
Сэтгэгдэл бичигдээгүй байна