Өмнөд Солонгосын дуучин "Psy"-ийг эмнэлэгт биечлэн очиж үзүүлэлгүйгээр сэтгэцэд нөлөөт эмийн жорыг гуравдагч этгээдээр дамжуулан авсан хэргээр шалгаж эхэлжээ. Сөүл хотын Сеодэмүн хотын цагдаагийн газраас мэдээлснээр "Psy" болон нэгэн их сургуулийн эмнэлгийн эмч нарыг Эмнэлгийн үйлчилгээний тухай хуулийг зөрчсөн хэргээр шалгаж байгаа аж.
Өдгөө 48 настай "Psy" 2022 оноос хойш саяхныг хүртэл биечлэн зөвлөгөө авалгүйгээр нойрны эмгэг, айдас, сэтгэлийн хямралыг эмчлэхэд хэрэглэдэг "Xanax" болон "Stilnox" эмийн жорыг бичүүлжээ. Жорыг түүний менежер болон бусад гуравдагч этгээд дуучны нэрийн өмнөөс авсан гэж таамаглаж байна.
Өмнөд Солонгос улсын Эмнэлгийн үйлчилгээний тухай хуулийн дагуу эмийн жорыг өвчтөнтэй зөвлөлдсөний дагуу бичих ёстой, өвчтөнөөс өөр хүн тус жорыг бичүүлж авахыг хатуу хориглодог.
"Xanax" болон "Stilnox" эмүүд нь хамаарал үүсгэдэг, донтуулах эрсдэл өндөртэй сэтгэцэд нөлөөт эмийн ангилалд багтдаг. Иймд хэрэглээнд нь биечлэн хяналт тавих шаардлагатай байдаг аж.
Харин "Psy" гэм буруугаа хүлээн зөвшөөрч, алсын зайнаас зөвлөгөө авсны үндсэн дээр эм бичүүлсэн гэжээ. Түүний харьяалагддаг "P Nation" агентлаг Пүрэв гаригт албан ёсны мэдэгдэл гаргахдаа мансууруулах бодисыг гуравдагч этгээдээс хүлээн авсан нь илт буруу гэдгийг хүлээн зөвшөөрсөн юм. "
Psy" нойрны архаг эмгэгтэй гэж хэдэн жилийн өмнөөс оношлогдсон бөгөөд эмчийн хяналт дор дээрх эмүүдийг нойрны эм болгон хэрэглэсээр ирсэн аж.
Сэтгэгдэл (0)
Сэтгэгдэл бичигдээгүй байна