Д.Тогтохсүрэн: Зургаадугаар сарын 20-ноос өмнө сонгуулийн тухай хуулийг хэлэлцэж батална

Өнөөдөр /2023.03.27/ МАН-ын бүлэг хуралдаж, хуралдаанаас гаргасан шийдвэрийн талаар мэдээлэл хийлээ.

МАН-ын бүлгийн дарга Д.Тогтохсүрэн: "Өнөөдрийн хуралдаанаар нэг асуудал хэлэлцсэн. УИХ-ын сонгуулийн тухай нэмэлт өөрчлөлт оруулах тухай хуулийн төсөл. УИХ-ын даргын захирамжаар нэмэлт өөрчлөлт оруулах ажлын хэсэг ажиллаж байгаа. Парламентад суудалтай гурван намын төлөөлөл багтсан.

Үндсэн хуулийн 21.4-т сонгууль болохоос нэг жилийн өмнө Сонгуулийн тухай хуульд нэмэлт өөрчлөлт оруулахыг хориглоно гэж заасан байдаг. Тиймээс энэ дагуу бид зургаадугаар сарын 20-ноос өмнө Сонгуулийн тухай хуулийг хэлэлцэж батална. Бүлгийн хурлаар нэмэлт өөрчлөлтийг хэлэлцлээ. Лхагва гарагт Засгийн газраар хэлэлцүүлнэ. Тэгээд УИХ-д өргөн барина.

1-т Сонгуулийг холимог тогтолцоогоор явуулахаар тусгаж байгаа. Өөрөөр хэлбэл 38:38 буюу 50, 50 хувиар. 50 хувь нь мажоритар, 50 хувь нь пропорционал намын жагсаалтаар. Энэ холимог системээр Сонгуулийн тухай хуулийг өргөн барьж байна.

2-т Сонгуулийн зардлыг бууруулах тухай. Энэ чиглэлээр хэд хэдэн чиглэлийн өөрчлөлт хийсэн. Сурталчилгааны самбар, ухуулагч, шадар туслахуудын тоо гэхчлэнг бууруулахаар тусгасан. Хоёр дахь гол өөрчлөлт энэ.

3-т Гадаадад байгаа иргэдийн саналыг авах тухай голчлон оруулж өгсөн.

4-т Улстөрийн намуудад тавьдаг босго оноог 3 хувь болгож оруулж байна.

5-т Нэр дэвшигчдийн нэг хүйс 20 хувь байсныг 30-аас доошгүй байхаар нэмэгдүүлж тусгалаа.

Ийм таван томоохон өөрчлөлтийг Сонгуулийн тухай хуульд тусгана. Засгийн газраас энэ долоо хоногт санал ирчихвэл, ирэх долоо хоногт УИХ-аар оруулан хэлэлцүүлнэ" гэлээ.