2026 оны нэгдүгээр сарын 11-ний өдөр Сонгинохайрхан дүүргийн нутаг дэвсгэрт ажил үүргээ гүйцэтгэж байсан цагдаагийн албан хаагч иргэнийг хэрэг хүлээлгэхийн тулд зодож, эрүүдэн шүүсэн байж болзошгүй бичлэг ил болсон нь нийгмийг цочроолоо. Уг бичлэгийг Эрүү шүүлтээс урьдчилан сэргийлэх үндэсний ажиллагаа олон нийтэд задлан мэдээлсэн бөгөөд хүний эрхийн ноцтой зөрчил гарсан байж болзошгүйг анхааруулсан юм.
Энэ бол ганц алба хаагчийн ёс зүйн асуудал биш. Энэ бол тогтолцооны асуудал.
Хэрэв төрийн нэрийн өмнөөс хүч хэрэглэх эрх бүхий байгууллагын алба хаагч иргэнийг эрүүдэн шүүсэн нь тогтоогдвол Монгол Улсын Үндсэн хууль, олон улсын гэрээ конвенцоор хүлээсэн үүрэг, хүний халдашгүй, чөлөөтэй байх эрхэд ноцтой халдсан хэрэг болно. Эрүү шүүлт бол ямар ч нөхцөлд зөвтгөгдөх боломжгүй, туйлын хориглосон үйлдэл.
Ийм нөхцөлд зөвхөн тухайн бичлэгт холбогдсон алба хаагчаар хариуцлага хязгаарлагдах ёсгүй. Удирдлагын хариуцлагын асуудал зайлшгүй хөндөгдөнө.
Цагдаагийн ерөнхий газар нь цагдаагийн байгууллагын бодлого, хяналт, сахилга хариуцлагын тогтолцоог бүхэлд нь удирдан зохион байгуулдаг төв байгууллага. Хэрэв доод шатанд эрүү шүүлтийн шинжтэй зөрчил гарч байгаа бол дотоод хяналт, сургалт, сахилгын механизм доголдсоны илрэл гэж үзэхээс өөр аргагүй. Учир нь Цагдаагийн байгууллага нь хуульд зааснаар иргэдийн эрх, эрх чөлөөг хамгаалах, гэмт хэрэгтэй тэмцэх, нийтийн хэв журмыг сахиулах үүрэгтэй байгууллага юм. Тиймээс Цагдаагийн ерөнхий газрын дарга, хошууч генерал Ж.Болд хариуцлага хүлээх ёстой
ЦЕГ-ын дарга Ж.Болд хариуцлага хүлээснээр тус байгууллагын нэр хүнд, мөрдөн шалгах ажиллагааны хараат бус байдалд сайн үр дүнтэй юм.
Сэтгэгдэл (7)