Трамп "Ираныг бөмбөгд" гэж дуулах бичлэгийг цахим хаягтаа нийтлэжээ

Ойрхи Дорнод дахь үйл явдлууд Даваа гаригаас хойш асар хурдацтай өрнөв. Өнөөдрийг хүртэл хугацаанд АНУ-ын агаарын бааз халдлагад өртөж, Цагаан ордон Иран-Израилийн гал зогсоох хэлэлцээг зуучилж, тэрхүү хэлэлцээ нь бүтэлгүйтэх дөхлөө.

АНУ өнгөрсөн амралтын өдрөөр Ираны цөмийн гурван объектыг бөмбөгдсөн. Иран үүний хариуд АНУ-ын олон мянган цэрэг байрлаж буй Катар дахь Аль Удейд агаарын баазад цохилт өгчээ. Үүнээс хэдэн цагийн дараа Трамп Иран-Израилийн хооронд гал зогсоох мэдэгдлийг зарласан билээ. Гэвч талууд хэн хэн нь эвлэрлийн гэрээг зөрчсөн гэж Трамп буруутгаж байна.

Тэрбээр "Өчнөөн удаан ширүүн тулалдаад, сүүлдээ юу хийгээд байгаагаа ч мэдэхээ больсон хоёр улс байна. Эвлэрлийн гэрээг зөрчсөнд би итгэхгүй байна. Ялангуяа яаран хөдөлсөн Израильд сэтгэл дундуур байна. Эвлэрлийг зарлав уу үгүй юу Израиль миний урьд өмнө харж ч байгаагүй их тэсрэх бөмбөг хаяв. Миний харж байсан хамгийн томоохон цохилт байлаа. Израильд сэтгэл дундуур байна. Гал зогсоох 12 цагийн хугацаа өгч байхад тэд ердөө эхний цагт нь л халдлага үйлдлээ. Иранд ч бас сэтгэл хангалуун бус байна" гэжээ.

Мөн тэрбээр "Truth Social" хаягаараа "ИЗРАИЛЬ, БӨМБӨГ ХАЯХАА БОЛИНО УУ. ЭНЭ БОЛ ГЭРЭЭ ЗӨРЧСӨН ЯВДАЛ. НИСГЭГЧДЭЭ ГЭРТ НЬ ХАРИУЛ, ЯГ ОДОО" гэж бичжээ.

Гэвч гал зогсоох хэлэлцээртэй эсрэгцсэн нэгэн бичлэгийг Трамп цахим сүлжээндээ нийтэлжээ. 60 секунд үргэлжлэх тус бичлэгт "B-2" бөмбөгдөгч онгоцнууд тэнгэрээр нисэлдэж, бөмбөг хаях аж. Бичлэгийн ард "Ираныг бөмбөгд" гэж дуулах сонсогдоно. "Beach Boys" хамтлагийн коверлосон "Barbara Ann" дууны үгийг гуйвуулан "Ираныг бөмбөгд" гэж дуулсан нь тэр юм.

АНУ өнгөрсөн амралтын өдрүүдээр Ираны цөмийн байгууламжуудад цохилт өгсөн ч тэр нь бүтэлгүйтсэн гэх мэдээлэл гарах болсон. тэгвэл Ойрхи Дорнодын асуудал эрхэлсэн тусгай элч Стив Виткофф үүнийг үгүйсгэж, "Хохирлын үнэлгээний тайланг бүгдийг уншсан, АНУ-ын цохилт өгсөн гурван цөмийн объект бүгд устсанд эргэлзэхгүй байна" гэжээ.

Дашрамд дурдахад, нөхцөл байдалтай холбоотойгоор үүдээ барьсан байсан Иерусалим дахь АНУ-ын Элчин сайдын яам өнөөдрөөс хэвийн үйл ажиллагаагаа эхлүүлжээ. Гэсэн ч АНУ-ын төрийн албан хаагчид болон тэдний гэр бүлийн гишүүдийг Тель-Авив, Иерусалим, Бе’ер Шева зэрэг бүс нутгаас гарахыг хориглосон байна.

ЭХ СУРВАЛЖ: BBC