“Цалинтай ээж”-ийн 50 мянган төгрөгийг нэмэгдүүлэх эсэх асуудал олон нийтийн анхаарлын төвд байна. Хүүхдээ асарч буй ээжид 0-3 нас хүртэл нь сар бүр 50 мянган төгрөгийг нийгмийн халамжийн сангаас олгодог. Уг мөнгөний хэмжээг нэмэгдүүлэх шаардлагатай гэдэг асуудал олон жил яригдаж байна. Тэгвэл УИХ-ын зарим эмэгтэй гишүүд цалинтай ээжийн 50.000 төгрөгийг 500.000 төгрөгт хүргэх шаардлагатай талаар байр сууриа илэрхийлж эхэллээ.
Тухайлбал УИХ-ын гишүүн Үүрийнтуяа хэлэхдээ “Цалинтай ээж” хөтөлбөр нь халамжийн бодлогоор явах ёсгүй. Энэ бол хүн амын өсөлтийг дэмжсэн урамшууллын бодлого байх ёстой. Цалин гэж нэрлэж байгаа бол ядаж сард 500 мянган төгрөгийн тэтгэмжийг нийгмийн хамгааллын бодлогын хүрээнд олгох нь зүйтэй юм” гэв.
Харин нөгөө талаас УИХ-ын гишүүн Номинчимэг цалинтай ээжийн мөнгийг 500 мянган төгрөгт хүргэх боломжгүй талаар байр сууриа илэрхийлэв. Тэрбээр, “Миний хувь энэ мөнгийг 500 мянга болгох боломжгүй төсөв нь байхгүй гэж үзэж байна. Тавин мянган төгрөг гэдэг бол хөтөлбөртөө таараагүй нэр гэж боддог. Энэ хөтөлбөрийн нэрийг өөрчлөх хэрэгтэй. Зарчмын хувьд хүн амаа өсгөх иргэдийнхээ нийгмийн баталгааг өсгөх гэдэг утгаараа байж болох ч өнөөгийн нөхцөлд төсвийн орон зай байхгүй. Хүүхдийн мөнгө маш өндөр байгаа дээр цалинтай ээж гээд мөнгө тараах боломжгүй” гэлээ.
Сэтгэгдэл (2)