Монгол улсын засгийн газрын 395-р тогтоолоор Төв аймгийн Борнуур сумын иргэдэд нийт 161 га талбайг олгох захирамж 2024 оны дөрөвдүгээр сард батлагджээ. Энэхүү тогтоол одоог хүртэл хэрэгжээгүй байгаа төдийгүй иргэд тариалангийн болон өвөлжөөний талбайгаа авч чадахгүй нөхцөл байдалтай байна.
Тодруулбал, 2024 оны орон нутгийн сонгуулиар Төв аймгийн Борнуур сумын засаг даргаар томилогдсон В.Батболд иргэдэд тариалангийн 57 га талбай, өвөлжөөний 27 га талбайг олгохгүй байгаа аж. Нэг үгээр засгийн газрын шийдвэрийг биелүүлэхгүй иргэдийг хүнд нөхцөл байдалд хүргээд буй.
В.Батболд нь газар олгохгүй байгаа шалтгаанаа иргэдэд тайлбарлахдаа, “Өмнөх засаг даргын үед батлагдсан тогтоол захирамж надад хамаагүй” гэх тайлбар хэлэх атлаа өөрийн хамаарал бүхий этгээдүүдийн газрыг олгосон байна.
Дурьдвал, Эхнэр О.Хандсүрэнгийн “Могойт хүрээ” хоршоонд 5 га талбай, мөн түүнчлэн тус сумын байгаль орчны байцаагч н.Мөнхзулын нөхөр Жамсрангийн хамаарал бүхий Зэс Жамт хоршоонд 5 га талбай олгожээ.
Энгийн ард иргэдийн тариалангийн газрыг надад хамаагүй хэмээн олгохгүй атлаа өөрийн хамаарал бүхий этгээдүүдэд газар олгож байгаа нь улсын ажилд хэт хувийн ашиг сонирхолоороо хандаж байгаа төдийгүй илтэд хууль зөрчиж байгаа увиагүй үйлдэл юм.
Угтаа орон нутгийн сонгуулиар засаг дарга солигдох эсэх нь үл хамаарч төрийн ажил явах чигтээ дардам замаар үргэлжилэх учиртай. Гэтэл хууль бусаар засаг захиргааны эрхийг авсан этгээдүүд өөрийн дураар авирлаж Засгийн газрын шийдвэрийг үл гүйцэлдүүлж буй. Өөрөөр хэлбэл, Засгийн газраас дээгүүр эрх мэдэлтэй нөхдүүд Төв аймгийн Борнуур сумыг захираад сууж байна.
Сэтгэгдэл (19)