УИХ-ын гишүүн Н.Номтойбаяр: Шүүхээр гэм буруутай нь тогтоогдоогүй байхад аливаа аж ахуйн нэгж, компаниудыг буруутгаж, хөтлөн гүтгэж болохгүй

Шүүхээр гэм буруутай нь тогтоогдоогүй байхад аливаа аж ахуйн нэгж, компаниудыг буруутгаж, хөтлөн гүтгэж болохгүй. Түр хороо байгуулах тогтоолын төслийг өнгөрсөн гуравдугаар сард Үндэсний эвслийн дөрвөн гишүүн санаачлан гарын үсэг зурсан бөгөөд хуулийн дагуу шаардлагатай 32 гишүүний гарын үсгийг бүрдүүлэхийн тулд МАН, АН болон бусад намын гишүүдийн дэмжлэг хэрэгтэй байгаа. Энэ асуудлыг нэгмөсөн шалгаж, хэн нэгэн хэлмэгддэг эсвэл гэмт хэрэгтэн ял завшдаг байдлыг таслан зогсоох нь зүйтэй.

Нийслэлд хэрэгжих Туулын хурдны замын төсөл нь эдийн засаг, цаг хугацааны алдагдлыг бууруулахын тулд уг зам зайлшгүй шаардлагатай. Гэхдээ байгаль экологийн тэнцвэрт байдал, батлан хамгаалахын чиг баримжаа зэрэг олон хүчин зүйлийг тооцох ёстой. Ерөнхий сайдын гаргасан төслийг түр хойшлуулах шийдвэрийг зөв гэж үзэж байгаа. Хууль хяналтын байгууллагууд тендер, сонгон шалгаруулалттай холбоотой авлига, хулгайн асуудал байгаа эсэхийг нэн даруй шалгаж тогтоох шаардлагатай. Хуулийн зөрчилгүй нь тогтоогдвол бүтээн байгуулалтын улирал богино байдаг манай улсын хувьд ажлыг цаг алдалгүй урагшлуулах ёстой.

Засгийн газрыг бүрдүүлж буй нам, эвслүүдийн хамтран ажиллах гэрээний төсөлд Үндэсний эвслийн зүгээс авлига, хулгайтай тэмцэх томоохон асуудлуудыг тусгаж байгаа. Хөгжлийн банк, төмөр замтай холбоотой маргаантай асуудлуудыг нэг талд нь гаргаж, хуулийн хариуцлага тооцох механизмыг тодорхой болгох зэрэг саналууд багтсан. Засгийн газарт орсноор миний баримтлах зарчим өөрчлөгдөөгүй бөгөөд хэлсэн ярьсандаа эзэн болж, асуудлыг сууриар нь шийдвэрлэхийн төлөө ажиллана.

Ерөнхийлөгчийн санаачилсан хуулийн төслийн тухайд үзэл санааг нь дэмжиж байгаа ч хэрэгжүүлэх арга замтай нь санал нийлэхгүй байгаа. Энэ асуудлыг зөвхөн УИХ-ын гишүүдээр хязгаарлахгүйгээр Ерөнхийлөгч, Ерөнхий сайд, шүүгч, прокурор зэрэг төрийн өндөр албан тушаал хашдаг 50 орчим хүнийг хамруулсан цогц хууль гаргах нь зүйтэй гэж үзэж байна. Ингэж чадвал тэдний бүрэн эрхэд хамааралгүй хөндлөнгийн нөлөөллөөс хамгаалах, бусдын хяналтыг сайжруулах, эрх мэдлийн хязгаарлалт тогтоох, хариуцлага тооцох механизмыг бүрдүүлэх боломжтой.

Гашуунсухайт, Ганцмодны төмөр замын холболт болон Туул хурдны зам зэрэг гадаадын хөрөнгө оруулалттай төслүүдийг хэт улстөржүүлэхгүй байхыг сэтгүүлчдэд уриалж байна. Монгол Улс эдийн засгийн хувьд урд хөршөөс 91.4 хувийн хамааралтай байдаг тул дотоодын улс төрөөс үүдэн хоёр улсын найрсаг харилцаа, эдийн засгийн хамтын ажиллагаанд сэв суулгахаас болгоомжлох нь төрийн бодлого байх ёстой гэв.