БНСУ-д ажиллаж байхдаа хоёр гараа алдсан Монгол иргэнд тус улсын ассамблейн дарга Ү Вон Шиг дэмжлэг үзүүлэхээ амлажээ

БНСУ-д үйлдвэрийн ослын улмаас хоёр гараа алдаж, 10 гаруй хагалгаанд орсон монгол иргэнтэй БНСУ-ын Үндэсний ассамблейн дарга Ү Вон Шиг биечлэн уулзаж, дэмжлэг үзүүлэхээ амлажээ

Тодруулбал, Монгол иргэн О нь 2019 оны арванхоёрдугаар сард нарны зай хураагуур суурилуулж байхдаа өндөр хүчдэлд цохиулсны улмаас олон удаа хагалгаанд орж, хоёр гараа алдсан байна. Хэдийгээр компани хариуцлага үүрэх байсан ч шүүхээр хүлээсэн хохирлоо огт барагдуулаагүй аж.

Улмаар монгол иргэн О зургаан жилийн турш түлэгдэлтийн эмчилгээ хийлгэж, санхүүгийн хүндрэлд орж, хандивын аян хүртэл өрнүүлж байжээ.