Ховд аймгийн Жаргалант сумын төвд өчигдөр /2025.08.26/ 16:55 цагаас эхлэн 40 минутын турш түр зуурын усархаг бороо, мөндөр оржээ. Усархаг борооны улмаас 84 айл, өрхийн 95 гэр, 84 хашаа, 12 байшин, 14 орон сууцны B1 давхар үерийн усанд автсан байна. Иргэдийн дуудлагаар аймгийн Онцгой байдлын газрын алба хаагчид ажиллаж, 314 тонн усыг соруулж, таван км газар далан сэргээж, гурван автомашиныг татан гаргажээ.
Мөн аймгийн Зэрэг сумын Бураа багийн Өвдөг гэдэг газар усархаг аадар бороо, орсны улмаас зургаан айлын гэр, үерийн усанд автсан байсныг аюулгүй болгосон байна.
Цаг уурын байгууллагаас өнөөдөр /2025.08.27/ баруун болон төвийн аймгуудын нутгийн зарим газар, говийн аймгуудын нутгийн баруун, зүүн аймгуудын нутгийн хойд хэсгээр дуу цахилгаантай аадар бороо орох тул болзошгүй мөндөр, аянга цахилгаан, үерийн аюулаас сэрэмжтэй байхыг анхааруулж байна.
Сэтгэгдэл (0)
Сэтгэгдэл бичигдээгүй байна