Өмнөговь аймгийн Даланзадгад суманд 4.5 тэрбум төгрөгөөр зам тавина

Өмнөговь аймгийн худалдан авах ажиллагааны газраас "Даланзадгад сумын 7-р багийн Хавцгайт хорооллын хатуу хучилттай автозамын ажлыг эхлүүлэх" нэртэй тендерийг өнөөдөр зарлажээ.

Тендерийн нийт төсөвт өртөг 4,533,000,000 /4.5 тэрбум/ төгрөг бөгөөд 2025 ондоо санхүүжилтийг бүтэн олгоно.  Төлөвлөж буй дөрвөн трасс замын нийт урт 3 км аж.

Зураг төсөлд зааснаар шалгарсан компани замын ажлаас гадна цахилгаан, гэрэлтүүлгийн ажлыг хариуцах юм байна.

Авто замын зураг төслийг 2024 оны 12-р сарын 13-д Ихэрмөнх ХХК хийж гүйцэтгэсэн. Уг компани Улсын бүртгэлийн ерөнхий газарт

• Төлбөр эсвэл гэрээний үндсэн дээр хийгдэх бөөний худалдаа
• Гэрийн мод, модон эдлэлийн үйлдвэрлэл, худалдаа
• Аялал жуулчлал гэсэн гурван төрлийн үйл ажиллагаа эрхлэх чиглэл бүртгүүлжээ.

Компанийн эцсийн өмчлөгч бөгөөд гүйцэтгэх захирал Чойдогсүрэнгийн Батмөнх нь 2024 оны 8-р сарын 12-д компанийн эзэмшигчээр бүртгэгдсэн байна.