Түүхэнд анх удаа АНУ, Мексик, Канад гэсэн гурван улсад зэрэг хөлбөмбөгийн ДАШТ зохион байгуулагдаж байгаа бөгөөд нээлтийн цуврал ёслолын үйл ажиллагаа болно. Уг тэмцээн нь зургаадугаар сарын 11-ээс долоодугаар сарын 19-ны өдрүүдэд АНУ-ын 11 хот, Мексикийн 3 хот, Канадын 2 хотод зохион байгуулагдан болох болно. Өнөөдөр Мексик улсад тус тэмцээн нээлтээ хийснээр хөлбөмбөгийн ДАШТ-ийг гурван удаа зохион байгуулсан анхны улс боллоо.
Нээлтийн үйл ажиллагаа: Мексикийн уугуул ацтек үндэстний онцлог, соёлыг харуулсан дуу бүжиг, олны танил оддын үзүүлбэрүүдийг шингээсэн байв. Өнгө өнгийн дэрвэгэр хормойтой даашинзтай бүсгүйчүүд, солиут, гал, дроны гэрэлт шоу гээд нээлтийн үйл ажиллагаа эрч хүчээр дүүрэн болсон гэж дэлхий дахинаа алмайран магтаж байна. Колумбын супер од Шакира, Нигерийн дуучин Бурна Бой нар энэ жилийн дэлхийн аваргад зориулан гаргасан албан ёсны сүлд дуу болох Dai Dai-г хамтарч дуулав. Бусад алдартай уран бүтээлчдийн дунд Мана, Дэнни Оушен, Лос Анжелес Азулес, Ж. Балвин нар багтжээ. Мексикийн төрийн сүлд дууг Алехандро Фернандес ямар ч хөгжимгүйгээр дуулсан нь тус улсын иргэн бүрийг огшоосон нь гарцаагүй.
ТОГЛОЛТУУД: Ингээд нээлтийн үйл ажиллагаа дууссаны дараа шөнийн 03 цагт Мексикийн шигшээ баг Өмнөд Африкийн шигшээг 2:0-ээр буулган авч, аваргын анхны тэмцээнээ ялалтаар эхлүүллээ. Мексикийн багийн тамирчин Хулиан Квиньес тоглолтын эхний 10 минутад эхний гоолоо оруулсан юм. Үүний дараа тоглолтын хоёрдугаар хагаст Рауль Хименес хоёр дахь гоол оруулж, гайхалтай довтлогч гэдгээ баталж, ийнхүү хожив.
Дараагийн тоглолт өглөө 10 цагт Өмнөд Солонгос, Чех улсын багуудын хоорондын тэмцээн эхэлсэн. Тоглолтын эхний хагаст Солонгосын шигшээ баг найман довтолгоо хийсэн ч Чехийн хаалгач Матей Ковар амжилттай хамгаалсан. Үүний дараа Чех тоглолтыг эхлүүлж, найман минутын дараа Хван Ин-бом гоол оруулснаар Өмнөд Солонгосын тамирчид эрч хүч орсон билээ. Ингээд удалгүй Өмнөд Солонгосын баг 2 оноо авч, Чехийн баг 1 оноо авснаар ширүүхэн өрсөлдөөн өндөрлөсөн. Өмнөд Солонгосын баг дөрвөн удаагийн ДАШТ-ий дараа анх удаагаа улирлаа ялалтаар эхлүүлж байгаа нь энэ байлаа.
Дараагийн тоглолт 3.4 сая хүн амтай Босни Герцеговина Бүгд Найрамдах улс Канадын эсрэг шөнийн 03:00 цагт тоглоно. Харин маргааш өглөө 09:00 цагт АНУ-ын шигшээ багын эсрэг Парагвай улсын баг тоглох болно.
ХӨЛБӨМБӨГИЙН ДАШТ-ИЙ БҮХ ТОГЛОЛТЫН ХУВААРЬ: https://asu.mn/qgb
Сэтгэгдэл (0)
Сэтгэгдэл бичигдээгүй байна