Ерөнхий сайд Л.Оюун-Эрдэнийн хүү Тэмүүлэн найз бүсгүйдээ өндөр үнэтэй эд, зүйлс бэлэглэсэнтэй холбоотойгоор түүнийг болон аавыг нь орлогоо нотлохыг шаардан иргэд шүүмжилж буй. Энэхүү шүүмжлэл эрчээ авч "Огцрох амархан" жагсаал гурван өдөр төв талбайд үргэлжилж байна.
Иргэд Ерөнхий сайд Л.Оюун-Эрдэнийг огцрохыг шаардан ийнхүү жагсч буй. Жагсаалд зорин ирж байгаа иргэдийн олонх нь залуус байна.
Тэд “Ард түмний амьдрал татвар татаасанд дарагдсан хүнд хэцүү байхад бидний төлсөн татварын мөнгөөр дээдсийн хүүхдүүд 20 саяын цүнх үүрээд явж байгаа нь шударга бус байна” гэх зүйлийг голчлон илэрхийлж байна. Мөн түүнчлэн Л.Оюун-Эрдэнийг Ерөнхий сайд болсон цагаасаа хойш дорвитой хийсэн ажил байхгүй зөөлөн суудалд гурван жил тухаллаа хэмээн эсэргүүцээд байна.
Тэгвэл Ерөнхий сайд Л.Оюун-Эрдэнэ гурван өдөр жагсаж буй иргэдэд ямар ч тайлбар хийсэнгүй. Мөн түүнчлэн хүүгийнх нь тансаглалд сэтгүүлч тайлбар авахыг хүссэн ч хариулт өгөлгүй, бие хамгаалагчдаараа халхавчлан бултжээ.
Харин энэ асуудалд УИХ-ын гишүүд түүнийг тайлбар хийх ёстой хэмээн үзэж байна.
Тухайлбал, УИХ-ын гишүүн Б.Батбаатар хэлэхдээ, Хүмүүсийн яриад асуугаад байгаа энэ асуудалд Ерөнхий сайд Л.Оюун-Эрдэнэ хариулт өгөх ёстой. Аль ч утгаараа. Зөв ч байна уу буруу ч байна уу? Хэрэв үнэхээр орлогоосоо давсан хэрэглээ байгаа бол түүнийгээ ямар арга замаар яаж олж авсанаа илэн далангүй нээлттэй баримттайгаар хариулах үүрэгтэй. Энэ орлогоос давсан хэрэглээ үнэхээр байгаа бол энэ өөрөө хуулийн хариуцлага хүлээх үндэслэл мөн”
УИХ-ын гишүүн Н.Номтойбаяр: Тавьж байгаа шаардлага зүй ёсных. Хуулиараа төрийн ямар ч албан тушаалтан орлогоо үнэн зөв мэдүүлж байх ёстой.Хөрөнгө орлогын мэдүүлгээ үнэн зөв бөглөж, гарын үсэг зурдаг. Хэрэв худал мэдүүлсэн бол Зөрчлийн тухай хуулиар шийтгэдэг.
Энэ шаардлагыг зөвхөн Ерөнхий сайд Л.Оюун-Эрдэнэд тавиад байгаа юм биш, хэнд ч тавьж болно. Эцэг хүний хувьд ч тэр эрх бүхий төрийн өндөр албан тушаалтны хувьд ч тэр Монголд ирээд байр сууриа илэрхийлж таараа. Огцруулах асуудлыг идэвхтэй ярьж байна. Энэ үүссэн нөхцөл байдлыг Үндсэн хуульдаа юу гэж заасан бэ гэхээр Ерөнхий сайд би огцрох уу эс огцрох уу гэдгээ УИХ-д оруулдаг. Хэрэв би байсан бол энэ асуудлыг шууд оруулна” гэх байр сууриудыг илэрхийлээд байгаа юм.
ИНГЭЭД ТОМ ЗУРГААР ХАРВАЛ ИРГЭДИЙН ЭСЭРГҮҮЦЭЛ ШИРҮҮССЭН "ОГЦРОХ АМАРХАН" ЖАГСААЛ ХУРЦДАЖ ЗАСАГ УНАХ ТАЛ РУУГАА ХЭЛБИЙЖ БАЙНА.
Энэ үед улс төрийн халуун тогоонд дараагийн Ерөнхий сайдын нэрс яригдаж эхэлжээ.
Үүнд ЗГХЭГ-ын дарга Н.Учрал, Батлан хамгаалах яамны сайд С.Бямбацогт, Шадар сайд С.Амарсайхан нар байгаа аж. Эдгээр нэрсийг ЗГХЭГ-ын дарга Н.Учрал тэргүүлж байгаа аж.
Сэтгэгдэл (42)