УИХ-ын гишүүн Б.Найдалаа Боловсролын сайд П.Наранбаярын биед гэмтэл учруулсан эсэх асуудалд тайлбар өглөө. Тэрбээр "Өнөөдөр би ажилдаа орж байна. Хуваарьт хагалгаа хийлгэсэн. Тийм учраас уг асуудалд тайлбар өгч чадахгүй байсан юм. Энэ хороонд харамсалтай нь гадуур шуугиан гарсан байна. Бүр ардын аман зохиол шиг зохиомжилж, зодоон цохион хийсэн мэт ташаа мэдээлэл гарсан байна. Энд ерөөсөө тийм асуудал байхгүй. Өнгөрсөн долоо хоногийн Пүрэв гаригийн өглөө ХҮН намын зөвлөлийн ажил хэргийн хурал болсон. Ямар ч хурал улстөрийн хувьд маргаантай, мэтгэлцээнтэй, зарчмын байр суурь илэрхийлж явдаг. Тэр үед ёстой санамсаргүй тохиолдол болоод хөмсөг нь гэмтчихсэн. Өглөө 09:00 цагаас хурал хийдгээрээ хийсэн. Архи дарс ууж орой үдэш болсон асуудал биш. Жинхэнэ санамсаргүй тохиолдол болоод тийм осол болчихсон юм. Хурал дээр жижиг сажиг маргаан байдаг. Тухайн өдөр миний бие УИХ-ын нэгдсэн чуулганд оролцоод үдээс хойш нь эмнэлэг явсан. Дараа нь яагаад тиймэрхүү дэвэргэсэн байдлаар мэдээлэл гарсаныг ойлгоогүй. Санамсаргүй тохиодолоор хүний нүд рүү гараа хийчихдэг шүү дээ. Тиймэрхүү л юм болсон. Би тухайн үед уучлал гуйсан. Хариуцлагатайгаар мэдэгдэхэд энэ цагдаад бүртгэгдээд байхаар гэмт хэрэг, зодоон цохионы асуудал биш. Шуугиан гарсанд харамсаж байна. Шаардлагагүй зүйл дээр ингэж шуугих хэрэг байна уу. Ёс зүйн байнгын хорооноос дуудсан асуудал байхгүй. Ямар чбайсан хүмүүсийн бодоод бичээд байгаа шиг зодолдсон асуудал байхгүй. Танхаарал биш. П.Наранбаяр сайд бид хоёр зодолдоод байх ч хүмүүс биш" гэв.
Эргэн сануулахад, өнгөрсөн долоо хоногийн Пүрэв гаригт /2025.03.27/ Боловсролын сайд П.Наранбаяр бусдад зодуулж хөмсгөн тус газраа хоёр оёдол тавиулсан талаарх мэдээлэл олон нийтэд ил болсон юм. Тэгвэл Цагдаагийн байгууллагаас /2025.03.27/-ний өдөр 15:00 цагийн орчимд “Төрийн ордонд Боловсролын сайдыг УИХ-ын гишүүн цохиж, биед нь хохирол учруулсан” гэх дуудлага мэдээлэл ирж, бүртгэгдсэнээр УИХ-ын гишүүдийн биед учирсан хохирлыг тогтоох бусад нотловол зохих байдлыг тогтоохоор шалгалтын ажиллагааг үргэлжлүүлж байна гэж мэдэгдээд байсан юм. Уг хэргийн талаар УИХ-ын гишүүн, Боловсролын сайд П.Наранбаяр “Зодоон бол болоогүй. Тийм балай юм Төрийн ордонд хийхгүй шүү дээ. Зодолдоно гэдэг хоёр талаасаа зодолдохыг хэлнэ, тийм зүйл болоогүй. Хуралдах үеэр үл ойлголцол үүссэн. Би бол цагдаад гомдол мэдүүлээгүй. Санамсаргүй байдлаар хөмсөг задарч хоёр жижиг оёдол тавиулсан” гэх тайлбар мэдээллийг өгсөн юм.
Сэтгэгдэл (2)