Калифорнид химийн хорт бодис алдагдах эрсдэл үүсэж, 50.000 иргэнийг нүүлгэн шилжүүлэв

АНУ-ын Калифорни мужийн Оранж хотод химийн хорт бодис бүхий үйлдвэрийн нөөцлүүр дэлбэрэх, эсвэл их хэмжээний бодис алдагдах онц ноцтой эрсдэл үүссэнтэй холбогдуулан амбан захирагч Гэвин Ньюсом онц байдал зарлалаа.

Гарден Гроув хотод байрлах "GKN Aerospace" үйлдвэрт гарсан уг ослын улмаас эрх баригчид 50,000 орчим оршин суугчийг яаралтай нүүлгэн шилжүүлж, аврах ажиллагааг тасралтгүй явуулж байна.

Аюулын гол эх үүсвэр нь хуванцар үйлдвэрлэлд ашигладаг, өндөр шатамхай чанартай 7,000 галлон метил метакрилат (MMA) агуулсан гэмтэлтэй нөөцлүүр юм. Оранж хотын Гал түймэртэй тэмцэх газрын даргын мэдэгдсэнээр, уг нөөцлүүр бүтцийн хувьд эвдэрч олон мянган галлон хорт шингэн асгарах, эсвэл дулааны хяналтгүй урвалд орж дэлбэрэх гэсэн хоёрхон үр дагавар хүлээгдэж байгааг онцгойлон анхааруулав.

Аврах багийнхан химийн бодисын температурыг бууруулахаар цаг хугацаатай уралдан ажиллаж байна. Уг бодисын гал авалцах хамгийн тохиромжтой хэм нь Фаренгейтийн 50 градус байдаг.

Эхэндээ дроны хэмжилтээр температур 61 градус болж буурсан гэж үзэж байсан ч энэ нь зөвхөн нөөцлүүрийн гаднах гадаргуугийн хэм байжээ. Бодит байдал дээр дотоод температур цагт нэг градусаар нэмэгдэж, баасан гаргийн орой гэхэд 90 градуст хүрсэн нь нөхцөл байдлыг улам хүндрүүлэв.

Энэхүү аюулын улмаас 9 хавтгай дөрвөлжин миль талбайг хамарсан албадан нүүлгэн шилжүүлэх захирамж гарчээ. Гарден Гроув хотоос гадна Сайпресс, Стэнтон, Анахайм, Буэна Парк, Вестминстер зэрэг таван хотын иргэд үүнд өртсөн бөгөөд нийт 13 сургуулийг сулласан байна. Ойролцоох хотуудад нээгдсэн түр хоргодох байрууд амралтын өдрүүдээр дүүрсэн тул нэмэлт байгууламжуудыг ашиглалтад оруулжээ. Цагдаагийн байгууллагын мэдээлснээр, эхний ээлжид иргэдийн 15 хувь нь гэрээ орхин явахаас татгалзаж байсан гэнэ.

Эрүүл мэндийн газрын мэргэжилтэн, доктор Режина Чинсио-Квонг химийн бодис халж ууршсан тохиолдолд амьсгалын замын өвчин үүсгэх, нүд хорсох, дотор муухайрах, толгой өвдөх эрсдэлтэйг анхаарууллаа. Үүнтэй зэрэгцэн онцгой байдлын багийнхан хорт шингэн асгарсан үед далайн эрэг, гол горхи, ус зайлуулах хоолой руу орохоос сэргийлж элсний шуудайгаар асар том хамгаалалтын хаалт босгоод байна. Одоогоор хүний амь нас эрсэдсэн, бэртэж гэмтсэн тохиолдол бүртгэгдээгүй бөгөөд мэргэжилтнүүд аюулгүйн бүсийг хамгаалж, нөхцөл байдлыг тасралтгүй хянасаар байна.