БНХАУ-ын хойд хэсэгт орших Шаньси мужийн "Люшэньюй" нүүрсний уурхайд хүчтэй хийн дэлбэрэлт болсны улмаас сүүлийн арван жилд гараагүй томоохон осол бүртгэгджээ.
2026 оны тавдугаар сарын 22-ны баасан гаргийн орой газрын гүнд 300 орчим метрийн түвшинд гарсан уг дэлбэрэлтийн үед нийт 247 уурхайчин ээлжинд гарч ажиллаж байжээ.
Орон нутгийн эрх баригчдын мэдээлснээр ослын улмаас дор хаяж 82 хүн амиа алдсан нь батлагдсан байна. Аврах ажиллагаа амралтын өдрүүдэд үргэлжилж байгаа бөгөөд зарим хэвлэл мэдээллийн хэрэгслээр амь үрэгдэгсдийн тоо 90 хүрч болзошгүйг мэдээлжээ. Харин 100 гаруй уурхайчныг амжилттай аварч, ойролцоох эмнэлгүүдэд хүргэн эмнэлгийн тусламж үзүүлж байна. Одоогоор арав орчим уурхайчин сураггүй алга болсон, эсвэл нурангид дарагдсан байдалтай байгааг албаныхан онцоллоо.
БНХАУ-ын Дарга Ши Жиньпин сураггүй болсон уурхайчдыг эрэн хайх, аврах ажиллагаанд бүх хүчээ дайчлан ажиллахыг холбогдох албаныханд яаралтай үүрэг болгов. Тэрээр цаашид ийм төрлийн осол гарахаас урьдчилан сэргийлэхийн тулд үйлдвэрлэлийн аюулгүй байдлын арга хэмжээг чанд мөрдөхийг шаардсан байна. Ослын голомтод онцгой байдлын өргөн бүрэлдэхүүн, эмнэлгийн багийнхан ажиллаж байгаа бөгөөд төрийн мэдлийн CCTV сувгаар аврагчид газрын гүн рүү орж буй дүрс бичлэгийг дамжуулжээ.
Хийн дэлбэрэлт гарах болсон шалтгааныг тогтоохоор мөрдөн байцаалтын ажиллагаа эрчимтэй явагдаж байна. Уг уурхайг "Shanxi Tongzhou Group Liushenyu Coal Industry" компани эзэмшин ажиллуулдаг бөгөөд Синьхуа агентлагийн мэдээлснээр тус компанийн удирдлагууд болон хариуцлагатай албан тушаалтнуудыг хуулийн дагуу саатуулан шалгаж эхэлжээ. Хятадын засгийн газар энэхүү эмгэнэлт явдалд буруутай этгээдүүдэд хатуу шийтгэл оногдуулахаа амлаж, улс орон даяар хууль бус уул уурхайн үйл ажиллагааны эсрэг хатуу тэмцэл өрнүүлэхээ мэдэгдлээ.
Сэтгэгдэл (0)
Сэтгэгдэл бичигдээгүй байна