"Эрдэнэс Тавантолгой" ХК өнгөрсөн оны цэвэр ашгаас 1072 хувьцаатай иргэн бүрд 63 мянган төгрөгийн ногдол ашиг олгох шийдвэрийг эцэслэн баталжээ. Тус компанийн хувьцаа эзэмшигчдийн ээлжит хурал өнөөдөр буюу дөрөвдүгээр сарын 28-нд болж, санхүүгийн тайлангаа хэлэлцсэнээр дээрх шийдвэрт хүрчээ. Төлөөлөн удирдах зөвлөл болон Засгийн газрын чиглэлийн дагуу иргэдийн данс руу хийх гүйлгээг дөрөвдүгээр сарын 30-ны дотор бүрэн шилжүүлж дуусгах үүрэг хүлээсэн байна.
"Эрдэнэс Тавантолгой" ХК 2025 онд уурхайн олборлолтоо 30 сая тонноор төлөвлөсөн ч олборлолт 30.2 сая тоннд хүрчээ. Борлуулалтын хувьд 2025 оны жилийн эцсээр 27.6 сая тонн борлуулж, 1.7 тэрбум ам.долларын орлого буюу 5.8 их наяд төгрөгийн орлого төвлөрүүлсэн байна.
Татвар, хураамжийн хувьд 2025 онд 1.6 их наяд төгрөгийн татварыг улс болон орон нутгийн төсөвт төвлөрүүлсэн. Цэвэр ашиг нь 1 их наяд 124 тэрбум төгрөг гэсэн үзүүлэлтээр санхүүгийн тайлан эцэслэгдэж, аудитын дүгнэлт авсан байна.
ТУЗ-ийн шийдвэрийн дагуу 2026 оны дөрөвдүгээр сарын 30-ны өдөрт багтаан ногдол ашиг олгох ажлыг холбогдох хууль тогтоомжийн хүрээнд зохион байгуулах аж. 1,072 хувьцаатай иргэн татварын өмнөх дүнгээр 70,270, татвар суутгаснаар 63,000 төгрөг олгогдоно. Иргэдэд нийт 208 тэрбум төгрөгийн ногдол ашиг хуваарилахаар байгаа аж.
Сэтгэгдэл (0)
Сэтгэгдэл бичигдээгүй байна