2024 оны 11 сарын 15-ны өдөр Эрчим хүчний зохицуулах хорооноос цахилгааны үнийг 30 хувиар нэмэгдүүлсэн шийдвэрийг танилцуулсан. Улмаар үүнээс хойш гурван сар цахилгааны төлбөр хэт өндөр гарч байгаа талаар иргэд шүүмжилж үзэл бодлоо илэрхийлээд байна. Агаарын бохирдолыг бууруулахад хувь нэмрээ оруулахаар халаалтаа цахилгаанаар шийдсэн айлуудын тогны мөнгө 3-4 дахин нэмэгдэж гарч байгаа талаар иргэд ярьж байна.
Тухайлбал, СХД-ын иргэн Шижирбатынх яндангаа буулгаж халаалтаа цахилгаанаар шийдсэн хэдий ч цахилгааны төлбөр нь гурван сарын хугацаанд 200, 200 мянган төгрөгөөр нэмэгдэж гарчээ. Тодруулбал, энэ өрхийн 11 сарын төлбөр 500мянган төгрөг гарсан бол 12 сард 700 мянга, харин 1 сарын төлбөр 900 мянган төгрөг гарсан аж.
Тэрбээр хэлэхдээ, “Манай цахилгааны төлбөр 10 сарын 15-наас 11 сарын 15-ны хооронд 357 мянга гарч байсан түүний дараа сарын төлбөр 712 мянган төгрөг болж дахин нэмэгдсэн. Гэтэл 12 сарын 15-наас 1 сарын төлбөр 900 мянган төгрөг болж өсч гарч байгаа нь үндсэндээ сар тутам 40-50 хувиар нэмэгдэж гарч байна. Манай өрхийн хувьд цахилгаан зуухаар халаалтаа шийдээд хоёр жил болсон. Өнгөрсөн жилүүдэд хамгийн өндөр төлбөр 500 мянган төгрөг гарч байв. Гэтэл цахилгааны төлбөр нэмэгдсэнээс хойш ингэж хэд дахин нэмэгдэж гарч байгаа нь иргэдийн амьдралд хүндээр тусч байгаа. Ганцхан манайх ч биш олон айлууд ийм асуудалтай тулгарч байна” гэлээ.
Эрчим хүчний салбар алдагдалтай ажиллаж байгаа учраас цахилгааны үнэд өөрчлөлт оруулах зайлшгүй шаардлагатай гэж албаныхан хэлдэг. Гэвч угтаа тэрхүү алдагдлаа бууруулж, шаардлагатай хөрөнгийн эх үүсвэрийг бүрдүүлэхийн тулд хэрэглэгчдийн цахилгааны төлбөрийг нэмэх шийдвэр 30 хувь бус 3-4 дахин өссөн нь тодорхой байна .
Сэтгэгдэл (7)