ШИНЭ намын дэргэд Багш нарын лобби бүлэг байгууллаа

УИХ дахь ШИНЭ намын зөвлөл өнөөдөр ээлжит хуралдаанаа хийлээ. Зөвлөлийн хурлаар өнгөрөгч баасан гарагт батлагдсан Үндсэн хуульд нэмэлт, өөрчлөлт оруулах тухай хуулийн үр өгөөж, тус хуулийг батлахад ШИНЭ нам ямар үүрэгтэй оролцсон талаар хэлэлцэж, байр сууриа нэгтгэв. Түүнчлэн Монголын багш нарын үйлвэрчний эвлэл болон “Дөрвөн алтан бэрс” холбооны төлөөллийг тус тус хүлээн авч уулзан, салбарт нь тулгамдаж буй асуудлуудаар байр суурийг нь сонсож, санал солилцсон юм.

Батлаад гурав хонож буй Үндсэн хуулийн нэмэлт, өөрчлөлт оруулах тухай хуульд хэд хэдэн сайн заалт орж, дэвшил гарсан гэж тус намын дарга Ж.Батзандан мэдэгдлээ. Тэрбээр “УИХ-ын гишүүнийг эгүүлэн татах хариуцлагын заалт, хууль батлах ирцийн босгыг өндөрсгөх, Засгийн газрын бие даасан байдлыг бэхжүүлэх, улс төрийн тогтвортой байдлыг хангах, Стратегийн ордуудаас Монголын төр болон ард түмний хүртэх үр өгөөжийг дээшлүүлэх, Засаг захиргааны нэгжид өөрчлөлт оруулах зэрэг заалтуудыг тусгахад ШИНЭ намын УИХ дахь Зөвлөл санаачилгатай ажиллаж, оролцлоо” гэсэн юм. Зөвлөлийн хуралд Монголын багш нарын үйлдвэрчний эвлэлийн төлөөлөл болох 10 гаруй багш оролцож, салбартаа тулгамдаад буй асуудлуудын талаар мэдээлэл өглөө. Тэд тусгай сургуулиудын удирдлагаас бусад ЕБС-ийн захирлыг томилох эрхийг орон нутагт нь өгөх нь зүйтэй, мөн ЕБС-уудад 40 гаруй ажил хариуцдаг аргазүйч хэмээх ажлын байр байдаг ч эрх, үүргийг нь хуульчлаагүй байгаа. Нийгэм, цаг үеийн шаардлагаар "Хүүхэд харагч" хэмээх ажлын байр бий болсон, энэ салбарт цөөнгүй хүн ажиллаж байгаа ч хууль эрхзүйн зохицуулалт байхгүй, хувьсах зардлыг нь олгохгүй байгаагийн улмаас үйл ажиллаагаа явуулахад хүндрэлтэй байгаа гэх мэт олон асуудлыг хөндлөө. Хэлэлцүүлгийн үр дүнд ШИНЭ намын дэргэд Багш нарын лобби бүлэг байгууллаа. Тус лобби бүлэг ШИНЭ намын зөвлөлтэй хамтран Засгийн газарт асуулга тавьж, удахгүй Засгийн газраас оруулж ирэх Боловсролын тухай багц хуульд саналаа боловсруулж өгөхөөр шийдвэрлэв. ШИНЭ намын дэргэд Мал аж ахуйн хөгжлийн бодлогын зөвлөл байгуулж, Ажил олгогч малчид, эздийн нэгдсэн холбоотой хамтран ажиллаж буй. Энэ удаагийн Зөвлөлийн хуралд “Дөрвөн алтан бэрс” ТББ, “Монгол говь” нүүдэлчин, малчдын холбооны төлөөлөл оролцож, Эрүүгийн хуульд өөрчлөлт оруулах тухай хуулийн төсөл, Зөрчлийн тухай хуульд нэмэлт, өөрчлөлт оруулах тухай хуулийн төсөлд малын хулгайтай тэмцэх хариуцлагын заалтыг чангатгах талаар байр сууриа илэрхийлсэн юм. Тэдний саналыг ШИНЭ намын дэргэдэх Мал аж ахуйн хөгжлийн бодлогын зөвлөл боовсруулж буй баримт бичиг, мөрийн хөтөлбөртөө тусгаж ажиллахаар боллоо.