Тагнуулын ерөнхий газрын даргаар П.Одонбаатарыг томиллоо

Өнгөрсөн долоо хоногт Тагнуулын ерөнхий газрын дарга Д.Гэрэлийг өөрийнх нь хүсэлтээр үүрэгт ажлаас нь чөлөөлсөн билээ.

Тэгвэл өнөөдөр Засгийн газар ээлжит хуралдаанаараа Тагнуулын ерөнхий газрын даргаар тэргүүн дэд даргаар ажиллаж байсан П.Одонбаатарыг томилсон байна.

П.Одонбаатар нь 1974 онд Дундговь аймгийн Мандалговь хотод төрсөн. Цэргийн байгууллагад нийт 25 жил ажилласан, цэргийн хурандаа цолтой юм байна. Цагдаагийн дээд сургуулийг хуульч мэргэжлээр төгссөн.

Тэрбээр 1996-1999 онд Дундговь аймгийн Засаг даргын дэргэдэх Цагдаагийн хэлтэст мөрдөн байцаагч, 1999-2001 онд Улсын аюулгүй байдлыг хангах ерөнхий газрын Мөрдөн байцаах хэлтэст мөрдөн байцаагч, 2001-2015 онд Тагнуулын ерөнхий газрын Мөрдөн байцаах хэлтэст ахлах мөрдөн байцаагч, тасгийн дарга, хэлтсийн орлогч дарга, хэлтсийн дарга, 2018-2019 онд Тагнуулын ерөнхий газрын албаны дарга, 2019 оноос Тагнуулын ерөнхий газрын Орон нутгийн газрын даргаар тус тус томилогдон ажиллаж байсан нэгэн ажээ.