МОСКВАД ХАЛДВАР АВСАН ХОЁР ОЮУТНЫГ ХАВЬТАЛД ОРУУЛАЛГҮЙГЭЭР АВЧИРЧЭЭ

ОХУ-аас эх орондоо ирэх хүсэлтэй 276 монгол иргэнийг Алтанбулаг боомтоор өчигдөр оруулж ирж, тусгаарлах ажиллагааг УОК-оос зохион байгуулав. Тэдний олонхи нь буюу 110 нь ОХУ-д сурдаг оюутнууд байгаа юм. 

ОХУ-ын Буриад улсын Засгийн газар манай иргэдийг Эрхүү хотоос Алтанбулаг-Хиагт боомтод дөрвөн автобусаар хүргэжээ. Дээрх иргэдийн 100 гаруй нь Москва, 90 орчим нь Эрхүү, 60 орчим нь Улаан-Үдэд суралцдаг оюутан юм байна. 

ХӨСҮТ-өөс оношлуурын баг явуулж, хилийн боомтод ажиллуулсан. Мөн хилийн 0101 дүгээр анги, цагдаа, онцгой, мэргэжлийн хяналтын байгууллагын алба хаагчид ажиллажээ. Тэдгээр иргэдийн 100 гаруйг нь Дархан-Уул аймагт, үлдсэн иргэдийг Улаанбаатар хотод авчирсан бөгөөд 21 хоног тусгаарлахаар болжээ. 

Дашрамд дуулгахад, манай улсын хоёр оюутан коронавирусийн халдвар авсан бөгөөд тэднийг ч хавьталд оруулахгүйгээр авчирна гэдгийг ОБЕГ-ын дарга Т.Бадрал хэлсэн юм. 

Коронавируст халдвар Ковид-19-аас шалтгаалсан энэ цаг үе, нөхцөлд ОХУ-д сурч байгаа монгол оюутнууд эх орондоо ирэх боломжоор хангаж тээвэрлэж өгсөн жолооч нар, Монгол Улсаас ОХУ-д сууж буй консулийн ажилтнуудад талархал илэрхийлж байна. Эх орондоо тавтай морил, эрүүл энх байгаарай.