"Баавгай болохсон" киног ОСКАРТ оролцуулах ёстой гэж үзэн ГАРЫН ҮСЭГ ЦУГЛУУЛЖ эхэлжээ

"Баавгай болохсон" киног Монгол Улсаа төлөөлөн Оскарын шагнал гардуулах ёслолд албан ёсоор төлөөлөн оролцох ёстой хэмээн үзэж гарын үсэг цуглуулж эхэллээ. Уг санаачлагыг "Нүүдэлчин зам" холбооны продюсер Ш.Номиндарь эхлүүлсэн байна. Тэрээр "Каннын кино наадмын албан ёсны уралдаант хэсэгт Монгол Улсаас анх удаагаа шалгарч, Монголын кино урлагийн түүхийг шинэ шатанд аваачин, дэлхий дахины А зэрэглэлийн томоохон кино наадмуудад оролцож, маш олон шагнал хүртэн, арав гаруй улсын кино театруудад албан ёсоор олон нийтэд хүрээд, Монголдоо хүртэл 2024 оны Box Office Топ 5-д жагссаар байхад "Баавгай болохсон" киног Монголын Үндэсний Кино Урлагийн Зөвлөл Оскарын шагнал гардуулах ёслолын анхан шатны шалгаруулалтад сонгохоос татгалзаад байгаа билээ.

Оскарын ёслолд сонгогдон оролцох бүх шалгуурыг бүрэн дүүрэн хангасан төдийгүй, Монгол кино урлагийн түүхэнд байгаагүй том амжилт ийнхүү гаргаад буй "Баавгай болохсон" кино нь утга агуулга, ур хийц, санаа сэдлийн хувьд онцгой чанартай бүтээл болсон бөгөөд, олон улсын үзэгч, мэргэжлийн шүүмжлэгч нар энэхүү бүтээлийн universal буюу дэлхий дахины түгээмэл шинжийг нь машид өндрөөр үнэлсэн байдгийг хэвлэл мэдээллийн тоймоос нь харж болно.