16 дахь удаагийн “Улаанбаатар” олон улсын кино наадам аравдугаар сарын 16-22-ны өдрүүдэд болно

Нийслэлийн Соёл, урлагийн газраас санаачлан Нийслэлийн Засаг даргын ивээл дор Монголын урлагийн зөвлөл, Монголын Үндэсний кино урлагийн зөвлөл, “Номадиа Пикчерс” компани хамтран 16 дахь удаагийн “Улаанбаатар” олон улсын кино наадмыг аравдугаар сарын 16-22-ны өдрүүдэд зохион байгуулах гэж байна.

Уг кино наадам нь Монголын кино урлагийн салбарыг хөгжүүлэх, дэлхийн нэр хүндтэй наадмуудад шалгарсан кино бүтээлийг монголын үзэгчдэд хүргэх, кино уран бүтээлчдийн олон улсын хамтын ажиллагааг нэмэгдүүлэх зорилготой. Тус наадам нь нээлтийн кино, монгол киноны уралдаант хэсэг, олон улсын баримтат ба уран сайхны киноны үзвэр, хүүхэд залуучуудын үзвэр, сургалт форум гэсэн үндсэн хэсэгтэй байх юм. 

Наадмын нээлтийн киногоор шалгарсан бүтээл нь тус наадмын хүрээнд дэлхийд нээлтээ хийх ба олон улсын кино наадам зохион байгуулагч, найруулагч, продюсер нарт танилцуулагдаж, олон нийтэд толилуулах бүрэн эрхээр хангагдах аж.