Хэрэглээний бараа, үйлчилгээний үнэ өмнөх оны мөн үеэс 5.1 хувиар өссөн байна

2024 оны эхний хагас жилийн статистик мэдээллийн голлох үр дүнг Үндэсний Статистикийн Хороо (ҮСХ)-ноос хүргэлээ.

Энэ үеэр хэрэглээний бараа бүтээгдэхүүн, үйлчилгээний үнэ буюу инфляцтай холбоотой мэдээллийг танилцуулав.

2024 оны зургаадугаар сард улсын хэмжээнд хэрэглээний бараа, үйлчилгээний үнэ өмнөх оны мөн үеэс 5.1 хувиар өссөн байна.

Улаанбаатар хотод энэ оны зургаадугаар сард инфляцын түвшин 4.8 хувьтай гарсан. Нийслэлийн хэмжээнд бараа бүтээгдэхүүн, үйлчилгээний үнэ өмнөх сараас дунджаар 0.4 хувиар өссөн байна.

Аймгуудыг авч үзвэл хэрэглээний бараа бүтээгдэхүүн, үйлчилгээний үнэ өмнөх оны мөн үеэс 3.2-8.9 хувиар өсжээ.

Инфляцын түвшин буюу хэрэглээний бараа бүтээгдэхүүн, үйлчилгээний үнэ өмнөх оны зургаадугаар сард 10.6 хувьтай гарч байсан. Харин энэ оны зургаадугаар сард 5.1 хувьтай гарсан.

Инфляцын өсөлтийн хурдцыг өмнөх оны мөн үетэй харьцуулахад 5.5 нэгж хувиар буурчээ.

Жилийн өмнөхтэй харьцуулахад инфляц 5.1 хувиар өссөн. Үүнийг бүлгээр дүнгээр авч үзвэл

 Хүнсний бараа, ундаа усны үнэ 4.7 хувь

Хувцас, бүс бараа, гутлын үнэ 5.4 хувь

Гэр ахуйн тавилга, барааны үнэ 5.4 хувь

Эм тариа, эмнэлгийн үйлчилгээний барааны үнэ 6.6 хувь

Зочид буудал, нийтийн хоол, дотуур байрны үйлчилгээний үнэ дүнгээрээ 9.6 хувиар тус тус өссөн үзүүлэлттэй байна.

Эдгээр бүлэг дотроос боловсролын үйлчилгээний бүлгийн үнэ дүнгээрээ өмнөх оны мөн үетэй харьцуулахад хамгийн өндөр буюу 16.8 хувиар нэмэгдсэн нь инфляц өсөхөд голлох нөлөөллийг үзүүлсэн. 

Импортын барааны үнэ өмнөх оны мөн үеэс 35.3 хувиар өсжээ. Энэ нь инфляцад 1.8 нэгж хувиар нөлөөлсөн байна.

Бараа үйлчилгээ болон хүнс, хүнсний бусаар нь бүлэглэж үзсэн.

Тодруулбал 2024 оны зургаадугаар сарын хүнсний барааны бүлгийн үнийг өмнөх оны мөн үетэй харьцуулахад 4.8 хувиар, хүнсний бус барааны бүлгийн үнэ дунджаар 5.2 хувиар өссөн.

Бүлгээр нь харвал

Барааны үнэ 4.6 хувиар

Үйлчилгээний үнэ 6.8 хувиар тус тус өссөн байна.