Ардын багш Ч.Дамдиншаравыг Хөдөлмөрийн баатар цолоор шагналаа

Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ойг тохиолдуулан Монгол Улсын Ерөнхийлөгч У.Хүрэлсүх төрийн дээд цол, одон, медаль гардуулж байна.

Монгол Улсын Ерөнхийлөгчийн зарлиг: 

Улсын шигшээ багийн тамирчнаас спортын замналаа эхлүүлж, Монгол Улсын бөхийн хөгжлийн төлөө тасралтгүй 60 гаруй жил хүчин зүтгэхдээ тив, дэлхийн олон арван тэмцээнд амжилттай оролцож 20 гаруй медаль хүртсэнээс 1968 онд Мехико хотод зохион байгуулагдсан зуны олимпын 19-р наадмын чөлөөт бөхийн 52 кг-ын жинд хүрэл медаль хүртэн Монгол Улсад олимпын анхны медалыг авчирч, эх орныхоо нэрийг дэлхийн тавцанд мандуулсан хийгээд бөхийн шинэ залуу үеийн дасгалжуулагчид, олон зуун шилдэг тамирчдыг бэлтгэхэд мэдлэг, чадвараа дайчлан ажиллаж Монгол Улсад бөхийн спортыг хөгжүүлэхэд оруулсан жинтэй хувь нэмрийг нь өндрөөр үнэлэн “Хангайн хүчтэн” дэвжээний зөвлөх дасгалжуулагч, Монгол Улсын Ардын багш, Гавьяат тамирчин Чимэдбазарын Дамдиншаравт Монгол Улсын орчин цагийн спортын салбар үүсэж хөгжсөний түүхт 100 жилийн ойг тохиолдуулан Хөдөлмөрийн баатар цол хүртээж, Алтансоёмбот тэмдэг Сүхбаатарын одонгоор  шагналаа.