Эверестийн оргилд гараад бууж явахдаа осолдсон эрэлхэг зоригтой уулчдад зориулж шүлгийн ном гаргажээ

Энэ жил дэлхийн ноён оргил болох Эверестийн оргилд нэмэлт хүчилтөрөгчгүй, хөтөчгүйгээр авиралт хийж гараад буух замдаа харамсалтайгаар осолдож амиа алдсан уулчин Ц.Өсөхжаргал, Л.Пүрэвсүрэн хоёрын гэгээн дурсгалд зориулж шүлгийн ном эмхлэн гаргажээ. 

"Дээдсийн зарлигтай тэнгэрлэг хөвгүүд" номыг Чимэдийн Түмэндэмбэрэл буюу Л.Пүрэвсүрэн агсны эмээ нь эрхлэн гаргасан бөгөөд зохиолчдын шүлгээс түүвэрлэн уг номыг гаргажээ. Эмээ Ч.Түмэндэмбэрэл, "Хүслийнхээ оргилд, зүрхнийхээ тугийг мандуулсан хайртай зээ хүү Л.Пүрэвсүрэн, түүний үнэн ч анд Ц.Өсөхжаргал нарынхаа мөнхийн гэгээн дурсгалд энэхүү номон суваргыг зориуллаа. Та хоёр минь эх нутаг ,элгэн түмэндээ эргэж төрөөрэй. Миний эргэн тойронд буй яруу найрагч, зохиолч найзууд, дүү нартаа баярлалаа чин сэтгэлийн бэлэг ямар сайхан байдаг юм гэдгийг энэ хүү номон суварга босгохдоо илүү ихээр мэдэрлээ. Номонд орсон найрагчдаас алдар нэр бус хүн чанар үнэртэнэ дахин дахин мэхийе та бүхэндээ" гэжээ.