Б.Лхагвасүрэн: 90 хоногийн хугацаанд банкинд ҮНДСЭН ӨР, ЗЭЭЛИЙН ХҮҮ төлөхгүй байж болно

Засгийн газрын хуралдаанаас гарсан шийдвэрийг танилцуулж байна. Тухайлбал, Сангийн сайд Ч.Хүрэлбаатар болон Монголбанкны Ерөнхийлөгч нар хамтран коронавирусийн дэгдэлтийн үеэр арилжааны банкуудын зээлийн хүүг царцаах боломжийн талаар мэдээлэл өгч байна. Сангийн сайд Ч.Хүрэлбаатар хэлэхдээ "Монгол Улсын Ерөнхий сайд өнгөрөгч долоо хоногт төв банк, арилжааны банкуудын удирдлагууд, санхүүгийн үйл ажиллагаа эрхлэгчдийн төлөөлөлтэй уулзаж, өндөржүүлсэн бэлэн байдлын үед иргэд, аж ахуй нэгж, бизнес эрхлэгчдэд зориулж зээлийн эргэн төлөлтийн уян хатан бодлого хэрэгжүүлэхийг хүссэн. Энэ дагуу Монгол банк, Сангийн яам, Санхүүгийн тогтвортой байдлын зөвлөл хамтран дараах шийдвэрүүдийг гаргажээ. Зээлийн ангилал, эргэн төлөлтийн хугацаанд  90-120 хүртэл хоногийн өөрчлөлт оруулсан" гэв.

Монголбанкны Ерөнхийлөгч Б.Лхагвасүрэн: Санхүүгийн тогтвортой байдлын зөвлөл хуралдаж, өндөржүүлсэн бэлэн байдлын үеийн хугацаан дахь үндсэн өр болон зээлийн хүүний төлөлтийг 90 хоног буюу гурван сараар хойшлуулж байна. Тэглээ гээд Монголбанкинд бүртгэгддэг хугацаа хэтэрсэн зээлийн ангилалд долдугаар сарын 25-ныг хүртэл орохгүй. Гэхдээ битгий төл гэсэн үг биш. Хэрвээ хугацаандаа төлөөд явбал эдийн засаг маань хурдан сайжирна.

1.  “Активыг ангилах, активын эрсдэлийн сан байгуулж, зарцуулах журам”-д:

а. Ипотек, цалин, тэтгэвэр болон бусад хэрэглээний зээл хэлбэрээр иргэнд олгосон зээлд тогтоох хугацааны ангиллыг “Хэвийн” зээлийн хувьд 15 хүртэлх хоног байсныг 90 хүртэлх хоног болгож, “Анхаарал хандуулах” зээлийн хувьд 91-120 хүртэлх хоног, “Чанаргүй” зээлийн хувьд 121-ээс дээш хоног байхаар тус тус тогтоож мөрдөх;

б. Хэрэглээний болон бизнесийн зээлийн бүтцийг өөрчилж, холбогдох гэрээнд өөрчлөлт оруулсан тохиолдолд уг зээлийг журмын дагуу бүтэц өөрчлөгдсөн активт тооцохгүйгээр, эцсийн ангиллыг хэвээр тогтоох;

в. Хэрэглээний зээлд 2020 оны 1 дүгээр сарын 31-ний өдрийн байдлаар тогтоосон чанарын ангиллыг тушаал мөрдөгдөх хугацаанд хэвээр мөрдөх;

2.  “Банкны үйл ажиллагааны зохистой харьцааны шалгуур үзүүлэлтийг тогтоох, түүнд хяналт тавих журам”-д:

а. Өөрийн хөрөнгийг хамгаалах нөөц зөрчигдөхөд авч хэрэгжүүлэх арга хэмжээг түдгэлзүүлэх;

б. Төлбөр түргэн гүйцэтгэх чадварын зохистой харьцааг 20 хувиар тогтоох;

3.  Дээрх зохицуулалтын хугацаа дуусах үед дээрх журмуудыг ердийн зохицуулалтын дагуу мөрдөхөөр шийдвэрлэлээ.

Эдгээр зохицуулалт нь Covid-19 цар тахлаас урьдчилан сэргийлэх арга хэмжээнээс үүдэн зээлийн эргэн төлөлтөө хийхэд хүндрэл учирч буй зээлдэгчид нь зээлийн үндсэн болон хүүгийн төлбөрөө түр хугацаагаар эргүүлэн төлөх боломжгүй тохиолдолд тухайн зээлдэгчийн зээлийн ангиллыг хэвээр үлдээж, Зээлийн мэдээллийн санд ангилал бууруулж мэдээлэхгүй байх боломжийг бүрдүүлж байна. Энэхүү арга хэмжээг авснаар зээлийг эргэн төлөх үүрэг алга болохгүй бөгөөд зээлдэгчдээс үнэхээр хүндрэл гарсан бол зээлдүүлэгч банктайгаа холбогдон зээлийн үйлчилгээний төлбөрийг хойшлуулах, зээлийн гэрээнд өөрчлөлт оруулах хүсэлт гаргах боломжтой.

Иймд, цаашид хэт их зээлийн өрийн дарамтыг үүсгэхгүйн тулд зээлээ өөрийн боломжит хэмжээгээр эргэн төлж байх нь илүү үр дүнтэй болохыг зээлдэгчид ойлгож, санхүүгээ зохицуулах нь зүйтэй гэж Монгол банкнаас зөвлөж байна.

Улсын хэмжээнд 419.000 зээлдэгч 18 их наяд төгрөгийн зээлтэйгээс 70-аас дээш хувийг  хэрэглээний зээл эзэлж байгаа аж.

ШУУД ҮЗЭХ: