АВ ДАР гэдэг нь аваад дардаг. Өвөг дээдсийн хувь хишгийн сав. Айл болгонд хуучны болон орчин үеийн хийцтэй цоохор эрээн авдар байдаг. Гэхдээ сүүлийн үед авдар ашиглахаа больсон гэх. Орчин үеийн шинэлэг тавилгыг шинэ гэр бүлүүд сонгодог болжээ. Өнгөрсөн жил Эрээнээр хоёр контайнер дүүрэн хуучны авдар урагшаа гарсан гэх мэдээлэл байна.

Авдар бол айл гэрт буян хишгийг хурайлан дуудаж, хуримтлуулан хадгалж байх сав билээ. Харамсалтай нь ихэнх айл ээж аав, эмээ өвөөгийнхөө эдэлж явсан авдрыг хуучирч муудсан хэмээн голж амбаар сав, тагтан дээрээ гарган хаяж хуучин хувцас, хэрэгтэй хэрэггүй эд зүйл агуулдаг сав болгожээ. Авдраа засуулах гэж байгаа нэлээдгүй хүмүүс өвөг дээдсээсээ өвлөн ирсэн буяныхаа савыг өвлийн идэш хийх хайрцаг төдийхнөөр ашиглаж байснаа өгүүлдэг. Гэтэл улаан махны шүүс дусаах байтугай уранхай хувцас хураахад цээртэй энэхүү эд тухайн айлын үнэтэй, цайтай бүхнийг үе дамжин хадгалж ирсэн юугаар сольшгүй нандин эрдэнэ билээ. Үе дамжин ирсэн эцэг эх, эмээ өвөөгийн авдарыг гэр орондоо залах нь буян хишиг дагуулдаг гэж үздэг эртний сайхан ёс байдаг аж. Өвөг дээдэс минь алтыг нь аваад авдрыг нь хаяв хэмээн гоомой зүйл хийсэн хүнийг зэмлэдэг. Үүгээрээ авдар нь алтнаасаа үнэтэй болохыг, аливаа юмны агуулга нь өнгөнөөсөө чухал гэдгийг сургаж буй хэрэг. Тиймээс өвөг дээдсээс өвлөж авсан буяныхаа савыг өнөөдрийн хэд гурван төгрөгөөр бусдад өгч олз омгийн үүдээ бүү хаагаарай. Дахин хэлэхэд айл гэрт эд хөрөнгө даллан дуудаж, буян хишиг хураан тогтоож байх учиртай энэхүү саваа энд тэнд хамаагүй хаяж элдэв хуучин зүйлээр бүү дүүргээрэй.