Тамаваши Б.Мөнх-Оргил сүмо бөхийн дээд зиндаанд хоёр дахь удаа ТҮРҮҮЛЛЭЭ

Японы сүмо бөхийн есдүгээр сарын тэмцээн буюу Аки башё өнгөрсөн амралтын өдрүүдэд өндөрлөж Монголын бөх Тамаваши Б.Мөнх-Оргил 13 даваа 2 унаатайгаар түрүүллээ.

Энэ бөшёд маегаширагийн 3-аас босож барилдсан тэрээр сүүлийн өдөр маегаширагийн 4-т эрэмбэлэгдсэн Такаясүг давж эзэн хааны цомыг өргөсөн. Өдгөө 37 настай Тамаваши Б.Мөнх-Оргил нь дээд зиндаанд түрүүлсэн хамгийн ахмад сүмоч болсон байна.

2019 оны нэгдүгээр сарын башёд анх түрүүлсэн тэрээр "Би өдөр бүр сандардаг байсан ч дэмжиж байгаа хүмүүсийнхээ итгэлийг алдахыг хүсээгүй" хэмээжээ. Аки башёг тэргүүлэн барилдсан их аварга Тэрүнофүжи Г.Ган-Эрдэнэ 5 даваа, 5 унаатай байхдаа өвдөгний бэртлийн улмаас тэмцээнийг орхисон бол озеки Митакэүми 4 давж, 11 унаснаар дараагийн башёд цол буурч барилдахаар болов.