23 настай бүсгүй таксины жолоочид дээрэмдүүлж, хүчиндүүлсэн хэрэг гарчээ

Таксины жолоочид эд зүйлсээ дээрэмдүүлсэн ноцтой хэргүүд цагдаагийн байгууллагад бүртгэгдсээр байна. Хамгийн сүүлд гэхэд өнгөрөгч амралтын өдрүүдэд БЗД-т XI хорооны нутаг дэвсгэрт 23 настай бүсгүй таксины жолоочид дээрэмдүүлж, хүчиндүүлсэн хэрэг гарчээ. Тодруулбал, 2020 оны нэгдүгээр сарын 19-ний өдрийн 11 цаг 45 минутын орчимд "Товчооны гүүрний доор таксины жолооч намайг зодож, хүчирхийлж, эд зүйлийг минь дээрэмдлээ" гэх дуудлага мэдээллийг 23 настай иргэн Т БЗД-ийн цагдаагийн гуравдугаар хэлтэст өгчээ.

Тус дуудлага мэдээллийн дагуу цагдаагийн алба хаагчид түргэн шуурхай ажиллаж, маргааш нь буюу 20-ны өдөр тус гэмт хэргийг үйлдсэн нийслэлд оршин суух хаягтай 29 настай эрэгтэйг илрүүлжээ. Тухайн этгээд нь өөрийн тээврийн хэрэгсэлдээ биеэ хамгаалах чадваргүй 23 настай иргэн Т-г зодож танхайрч, 40 мянган төгрөг, гурван ширхэг гар утас дээрэмдсэн гэсэн нөхцөл байдал урьдчилсан байдлаар тогтоогджээ. Одоогоор шалгалтын ажиллагаа үргэлжилж байна.