2020 оны нэгдүгээр сарын 01-нээс төрийн албан хаагчдын цалинг 8 ХУВИАР нэмнэ

Засгийн газрын ээлжит хуралдаанаар тэтгэвэр болон төрийн албан хаагчдын цалин, тэтгэмжийн асуудлыг хэлэлцлээ. Тухайлбал, 2020 оны нэгдүгээр сарын 01-нээс эхлэн төрийн албан хаагчдын цалин болон тэтгэврийг найман хувиар нэмэгдүүлэхээр болжээ. 

Мөн төрийн үйлчилгээний албан хаагчдад алба хаасан хугацааны нэмэгдэл олгохоор болов. 190 мянган төрийн албан хаагчийн дундаж цалин 1070.0 мянган төгрөгт хүрэх бөгөөд энэ нь 2014 оны нэмэгдлээс хойш 48.9 хувиар нэмэгдэж байна гэсэн үг юм. 2019 оны III улирлын байдлаар сарын дундаж цалин 1166.4 мянга, төрийн албан хаагчдын дундаж цалин 922.8 мянган төгрөг байна. Засгийн газар цалинг 2018, 2019 онд тус бүр найман хувиар, цэцэрлэг, ерөнхий боловсролын болон мэргэжлийн боловсрол олгох сургалтын байгууллага, шинжлэх ухааны салбарын төрийн үйлчилгээний албан хаагчдын цалинг 21.7 хувиар нэмлээ.