Завхан аймагт халдварын тохиолдол нэмж бүртгэгдсээр байна. Тодруулбал, Тосонцэнгэл суманд хийж буй тандалт судалгаагаар 2021 оны 3 сарын 18-ны өдөр, 4 сарын 16-ны өдрийн буяны ажлын хоёр голомт байгааг тогтоожээ. Нэг, хоёрдугаар хавьтлын 597 иргэнээс 276 иргэнд PCR шинжилгээ хийхэд 8 иргэн коронавирусийн халдвар авсан нь батлагдлаа.

Харин Завханмандал суманд "Шувуун хар уул" уул уурхайн компанийн 27 ажилтан, сумын нэгдүгээр хавьтлын 9 иргэний PCR шинжилгээг Ховд аймаг руу явуулснаас тус компанийн 13 ажилтан, сумын 1 албан хаагч коронавирусийн халдвар авсан байна. Сумын Онцгой комиссын зүгээс компанийн ажилчдаа эргүүлэн татах хүсэлтийг уламжилжээ. Сумын эмнэлгээ хүүхдийн цэцэрлэгтээ нүүлгэн шилжүүлсэн байна.