“Урт цагаан”-ы нэгдүгээр корпусыг нурааж эхэллээ

Нийслэлийн өмч ашиглалт, удирдлагын газраас өнөөдөр “Урт цагаан” үйлчилгээний төвийг дахин төлөвлөх ажлыг хэрэгжүүлж эхэлсэн талаар мэдээлэл хийлээ.   

Нийслэлийн Засаг даргын А/216 тоот захирамжаар “Урт цагаан” үйлчилгээний төвийн үйл ажиллагааг зогсоосон. Үүнтэй холбоотойгоор НИТХ-ын Тэргүүлэгчдийн 2020 оны тавдугаар 11-ний өдрийн 73 дугаар тогтоолоор “Урт цагаан” үйлчилгээний төвийн барилга байгууламжийг нийслэлийн өмчөөс хасах тухай шийдвэр гаргасан. Тогтоолын хэрэгжилтийг хангах хүрээнд нийслэлийн Засаг дарга “Урт цагаан” үйлчилгээний төвийн нэгдүгээр корпусыг буулгах, өмчийн бүртгэлээс хасах тухай А/736 тоот захирамжийг 2020 оны тавдугаар сарын 27-ны өдөр гаргасан. Энэ дагуу барилгын ажлыг эхлүүлэх зөвшөөрлийг Хот байгуулалт хөгжлийн газраас авч, хэрэгжилтийг ханган тус төвийн 1584 метр.квадрат талбай бүхий нэгдүгээр корпусын барилгыг нураах ажлыг эхлүүлсэн болохыг Нийслэлийн өмч ашиглалт, удирдлагын газрын дарга Ш.Үнэнбат хэллээ.

Урт цагаан” үйлчилгээний төвд үндсэн 30 түрээслэгч, 300 гаруй дам түрээслэгчид байдаг бөгөөд үндсэн түрээслэгчид тус төвийг нурааж, шинэ барилга барихыг эсэргүүцэн шүүмжлээд байгаа юм. Түүнчлэн нэр бүхий есөн аж ахуйн нэгж, иргэн нэгдэн Захиргааны хэргийн шүүхэд гомдол гаргажээ. Нийслэлийн өмч ашиглалт, удирдлагын газрын орлогч дарга Д.Рэнцэнбямба “2020 оны дөрөвдүгээр сарын 9-ний өдрийн Захиргааны хэргийн Давж заалдах шатны шүүхийн 279 дүгээр тогтоолоор захиргааны актын биелэлтийг түдгэлзүүлсэн. Ингэснээр тухайн акт хуульд нийцсэн эсэхийг шүүхээр шийдвэрлэх хүртэл хугацаанд захирамжтай холбоотой үйл ажиллагааг талууд явуулахгүй гэдэг шийдвэрийг гаргасан. Энэ шийдвэрийг хүчингүй болгох эсэх асуудлаар анхан шатны шүүхээр хэлэлцүүлэг эхлээгүй байна” гэсэн юм.