ЭМЯ-аас коронавирусийн асуудлаар ээлжит мэдээллээ хийлээ. Дэлхий дахинд Covid-19-ийн халдварын тохиолдол 10 саяд хүрлээ. Covid-19-ийн цар тахлын тохиолдол зургаан хоногийн дотор нэг саяар нэмэгдэж байна. 

Манай улсын хувьд өчигдөр ажиглалтад 7 хүн нэмж орсон бол 3 хүн ажиглалтаас гарчээ. Одоогоор 2136 хүн ажиглалтад байна. Үүргийн онгоцоор ирсэн цэргийн төв эмнэлэгт 93 хүн эмчлүүлж байгаа бгөөөд гол төлөв ахмад настай, архаг хууч өвчтэй хүмүүс аж.

ХӨСҮТ-ийн захирал Д.Нямхүү "Өчигдрийн байдлаар нийт 308 хүний шинжилгээнээс коронавирус илрээгүй. Мөн Сиднейгээс ирж, тусгаарлах байранд байгаа 262, ажиглах байранд байгаа есөн хүн, ХӨСҮТ-д ажиглалтад байгаа гурван хүнээс вирус илрээгүй.

Алтанбулаг боомтоор орж ирсэн 34 жолоочоос мөн вирус илрээгүй. Ингэснээр нийт батлагдсан 219 албан ёсны тохиолдлоос 175 хүнийг эдгэж ХӨСҮТ-ээс гаргасан. Эдгээрийг ангилбал 44 хүнээс 35 нь хөнгөн есөн хүн хүндэвтэр байна. ХӨСҮТ-д 81 хүн хяналтад байна. Бид дараагийн ээлжийн иргэдээ гадаадаас хүлээн авах бэлтгэлээ хангаад ажиллаж байна" гэлээ.