| | USD/MNT 0₮
УИХ-ын гишүүн Б.Батзориг, Б.Ундармаа, Л.Энхболд, Г.Солтан, Д.Дамба-Очир нарыг эрх мэдэл, албан тушаалаа урвуулж, ЖДҮХС-гаас өөрсдийн хамаарал бүхий компани, аж ахуйн нэгжийн нэрээр зээл авсан хэмээн буруутгаж, яллагдагчаар татан шалгахаар болж, бүрэн эрхийг нь түдгэлзүүлэх хүсэлтийг Улсын ерөнхий прокурор М.Энх-Амгалан УИХ-д хүргүүлж байсан удаатай. Тэгвэл Г.Солтан гишүүнээс бусад яллагдагчаар татсан тогтоолтой танилцсан болохыг хэвлэлүүд онцолж байсан. Тухайлбал, УИХ-ын гишүүн Г.Солтан хууль сахиулах байгууллагаас явуулж буй мөрдөн шалгах ажиллагаанд саад учруулж, АТГ, НПГ-аас яллагдагчаар татах тогтоолыг нь танилцуулахаар дуудахад ирэхгүй, мөрдөгчийн мэдэгдэх хуудас болон прокурорын зарлан дуудах хуудсыг авахгүй байсан аж. Иймд ЖДҮХС-гаас авсан зээлээ зориулалт бусаар зарцуулсан хэрэгт холбогдон АТГ-т шалгуулсан УИХ-ын гишүүн Г.Солтаныг албадан ирүүлэх захирамжийг Баянзүрх дүүргийн Эрүүгийн хэргийн анхан шатны шүүхээс гаргалаа.
Яллагдагчаар татах тогтоолтойгоо танилцаагүй Г.Солтан гишүүнийг албадан ирүүлэх захирамж гаргав