Д.Нямхүү: Турк улсын хоёр иргэн бүрэн эдгэрлээ

ЭМЯ-наас коронавирусийн нөхцөл байдлын талаарх ээлжит мэдээллээ хийлээ. Энэ үеэр ХӨСҮТ-ийн захирал Д.Нямхүү "Өнгөрсөн шөнө манай улсад сэжигтэй тохиолдол илрээгүй. Харин ОХУ-аас орж ирсэн иргэнд давтан шинжилгээ хийхэд коронавирус илэрлээ. Ингээд манай улсад батлагдсан 32 тохиолдол боллоо. Турк улсын хоёр иргэн эдгэрсэн. Таван төрлийн сорьцонд шинжилгээ хийж, гурван өдөр дараалан үзэхэд коронавирус илрээгүй. Тэд өөрсдийнхөө хүсэлтээр ХӨСҮТ-д үргэлжлүүлэн ажиглалтад байхаар боллоо" гэв.