АТГ-ын дарга З.Дашдаваа үүрэгт ажлаасаа чөлөөлөгдөх хүсэлтээ өгчээ

Авлигатай тэмцэх газрын дарга З.Дашдаваа өнгөрөгч зургаадугаар сард үүрэгт ажлаасаа чөлөөлөгдөх хүсэлтээ албан ёсоор өгсөн байна.

Хэдийгээр түүний бүрэн эрхийн хугацаа дуусах болоогүй ч тэрбээр эрүүл мэндийн шалтгааны улмаас ажлаа өгөхөөр болжээ.

Сануулахад, Монгол Улсын Ерөнхийлөгч асан Х.Баттулга АТГ-ын даргад З.Дашдавааг томилохоор санал болгож байсан бөгөөд 2019 оны тавдугаар сарын 2-ны өдрийн УИХ-ын чуулганы нэгдсэн хуралдаанаар хэлэлцэн, түүнийг дээрх албан тушаалд томилж байсан юм. Авлигын тухай хуульд "Авлигатай тэмцэх газрын даргыг Ерөнхий сайдын санал болгосноор Улсын Их Хурал томилгооны сонсгол хийж 6 жилийн хугацаагаар томилно" гэж заасан байдаг.

Уг хуулийн дагуу АТГ-ын дарга З.Дашдаваагийн бүрэн эрхийн хугацаа ирэх оны тавдугаар сарын 02-ны өдөр дуусгавар болох байсан ч ийнхүү ажлаа өгөхөөр болсон байна.

Харин түүний оронд ШШГЕГ-ын дарга асан О.Амарсанаа болон АТГ-ын Дэд дарга Г.Азжаргал нарын нэр яригдаж байгаа өгөөд ойрын хугацаанд томилгоо явагдана гэх эх сурвалжийн мэдээлэл байна.

Авлигатай тэмцэх газрын даргад төрийн албанд 15-аас доошгүй жил ажилласан, 45 нас хүрсэн, эрх зүйч мэргэжилтэй, удирдах болон мэргэжлийн ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй хүнийг томилно гэж заасан байдаг.