Д.Тогтохсүрэн: Лицензийн зөвшөөрлийг Засгийн газар олгож байгаа. УИХ-аар олгоно гэвэл замбараагүй зүйл болно

Өнөөдөр /2022.10.24/ УИХ дахь МАН-ын бүлэг хуралдаж, мэдээлэл хийлээ. Хуралдаанаар хоёр асуудал хэлэлцсэн байна. УИХ дахь МАН-ын бүлгийн дарга Д.Тогтохсүрэн: "Нэгдүгээрт, УИХ-ын гишүүн Н.Алтанхуягаас өргөн барьсан “Эрдэнэт үйлдвэрийн технологид тохирохгүй хүдрийн овоолгыг ашиглах тухай” УИХ-ын тогтоолыг хэлэлцлээ. Энэхүү овоолгыг ашиглах боломж байна гэж үзлээ. Засгийн газар энэ тогтоолыг шийдвэрлээд явах боломжтой тул УИХ-аар оруулах шаардлагагүй гэж бүлгийн гишүүд үзлээ.

Хоёрт, Боловсролын ерөнхий хуулийг концепц нэг бүрээр нь яриад шийдэлд хүрч байгаа. Хуулийн төслийн ажлын хэсгүүдийг шинэчлэн байгуулна. Нэг ажлын хэсэгтэй болно. Ингээд намрын чуулганд багтаан Боловсролын ерөнхий хууль болон дагасан хуулиудыг хэлэлцэж дуусгана гэдэг чиглэл өглөө.

Мөн тэрбээр сэтгүүлчдийн асуултад хариулт өглөө.

-Эрдэнэтийн овоолгыг Засгийн газар шийдвэрлээд явах юм байна. Дорноговь аймаг дахь ордуудыг яах вэ?

-Өнөөдөр мөрдөгдөж байгаа Ашигт малтмалын хуулиар лицензийн зөвшөөрлийг Засгийн газар олгож байгаа. УИХ-аар олгоно гэвэл замбараагүй зүйл болно.

-УИХ-ын дэд даргын томилгооны асуудлыг хэлэлцсэн үү?

-УИХ-ын дэд даргын томилгоотой холбоотой асуудлыг дараагийн бүлгийн хуралдаанаар ярилцах болов уу. Намын дүрэмд зааснаар Удирдах зөвлөл хуралдаж шийддэг. Нөгөө талаар УИХ-ын дарга гадаадад томилолттой.