Ээлжит бус чуулганыг хуралдуулж, улстөрчид бужигнахаар боллоо

Монгол Улсын Их Хурлын дарга Г.Занданшатар өчигдөр Монгол Улсын Үндсэн хуулийн Хорин долдугаар зүйлийн 3 дахь хэсэг, Монгол Улсын Их Хурлын тухай хуулийн 14 дүгээр зүйлийн 14.1.2, 19 дүгээр зүйлийн 19.1, 19.4, 19.5 дахь хэсгийг тус тус үндэслэн Монгол Улсын Их Хурлын ээлжит бус чуулганыг 2022 оны наймдугаар сарын 22-ноос 26-ны өдрүүдэд товлон зарлах тухай захирамж гаргалаа.

Ээлжит бус чуулганаар:

Үндэсний аюулгүй байдлын зөвлөлийн мэдээлэл;

Монгол Улсын Үндсэн хуулийн цэцийн 2022 оны 02 дугаар тогтоолтой холбоотой асуудал;

Цаг үеийн асуудлаарх мэдээлэл сонсох зэргийг хэлэлцэнэ.

Монгол Улсын Их Хурлын ээлжит бус чуулганы нэгдсэн хуралдааныг 2022 оны наймдугаар сарын 22-ны өдрийн Даваа гарагийн 10:00 цагт эхлэхээр товлосон гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлжээ.

Ээлжит бус чуулганаар ҮХНӨ-ийг хэлэлцэх бөгөөд ҮХЦ-ийн гаргасан шийдвэрээр дан дээлтэй сайд нарыг чөлөөлж, давхар дээлтэй сайд нарын асуудлыг хэлэлцэх нь тодорхой болов. Ийнхүү наймдугаар сарын улстөр албан ёсоор эхэлж, улстөрчид бужигнаж эхэллээ.