НҮБ-ын Ерөнхий нарийн бичгийн дарга Антонио Гутеррешийн албаны айлчлал эхэллээ

НҮБ-ын Ерөнхий нарийн бичгийн дарга Антонио Гутерреш Ерөнхийлөгч У.Хүрэлсүхийн урилгаар манай улсад энэ сарын 8-наас 11-ний өдрүүдэд албан ёсны айлчлал хийхээр Улаанбаатар хотноо хүрэлцэн ирсэн байгаа.

Түүний айлчлал өнөөдөр албан ёсоор эхэлж байгаа бөгөөд түүнийг угтан авах ёслолын ажиллагаа өглөө 08:45 цагт Сүхбаатарын талбайд болж, хүндэт харуул жагсаж, төрийн сайд нар угтан авлаа.  НҮБ-ын Ерөнхий нарийн бичгийн даргын түвшинд Монгол Улсын Ерөнхийлөгчийн урилгаар хийж буй анхны айлчлал юм.

НҮБ-ын Ерөнхий нарийн бичгийн дарга Антонио Гутерреш 2022 оны 08 дугаар сарын 09-ний өдөр Монгол Улсын Ерөнхийлөгч Ухнаагийн Хүрэлсүхэд бараалхаж, Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд мод тарих үйл ажиллагаанд оролцох юм байна.