| | USD/MNT 0₮
Дэлхийн шатрын 44 дүгээр олимпиад Энэтхэг улсын Ченнай хотноо үргэлжилж явагдаж байгаа бөгөөд өнгөрсөн шөнө 4 дэх өргийн тоглолт болж Монголын эрэгтэй, эмэгтэй баг өрсөлдөгч багуудтай тэнцлээ.
Норвегийн шигшээ баг Италийн шатарчдыг энэ удаа бараагүй. Ийнхүү 3 дахь өрөгт тэнцээ хийсэн ч баг нь хожигдсонд дэлхийн аварга Магнус Карлсен бухимдуу байсан юм. Олимпиадын 4 дэх өрөгт Норвеги-Монгол таарч Энэтхэгт болж буй дэлхийн шатрын олимпиадын нэг онцлох тоглолт боллоо. Өнгөрсөн шөнө 1 дүгээр ширээнд дэлхийн аварга Магнус Карлсен Монгол Улсын энэ жилийн аварга, Их мастер Д.Батсүрэнтэй тоглон ялалт байгуулсан.
Монголын шатарчид Норвегиас тэнцээний оноо авч чадсан нь яалт ч үгүй бахархам амжилт билээ. Их мастер Б.Гүндаваа, С.Билгүүн тэнцээ хийж, С.Ган-Эрдэнэ хожилтой. Ингэснээр манай эрчүүд 4 өргийн дараа 2 хожил, 2 тэнцээ гэсэн үр дүнгээр 6 оноотой 45-р байрт бичигдэж байна.
Монголын эмэгтэй баг өнгөрсөн шөнө Казахстаны багтай тоглож, мөн тэнцээ /2:2/ хийлээ. Эмэгтэйчүүд 3 хожил, 1 тэнцээ гэсэн үр дүнгээр 7 оноотой дөрөвдүгээр тойргийн дараа 9-р байрт бичигдэж байна.
Тавдугаар өргийн тоглолтууд өнөөдөр Монголын цагаар 17:30 минутаас эхэлнэ.
Тав дахь өргийн оноолт: Эрэгтэй баг Чехийн шигшээ багтай оноолт таарсан бол Эмэгтэй баг Германы шигшээ багтай оноолт таарсан байна.