У.Хүрэлсүх:Шүүгч та өргөсөн тангаргаасаа няцвал хуулийн дагуу хариуцлага хүлээх үүрэг ч таныг дагалдахыг санаарай

Монгол Улсын Нийт шүүгчийн анхдугаар чуулган Төрийн ордонд өнөөдөр эхэллээ. Монгол Улсын шүүхийн тухай хуулийг дагаж мөрдөх журмын тухай хуульд Нийт шүүгчийн чуулганыг 2021 оны 10 дугаар сарын 15-ны өдрийн дотор зохион байгуулахаар, Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд чуулганыг биечлэн зохион байгуулахаар тус тус заасан. Хуулийн дагуу хүндэтгэн үзэх шалтгаантайгаас бусад шүүгчид чуулганд биечлэн оролцож байна.

Улсын дээд шүүхийн шүүгч, чуулганыг зохион байгуулах Ажлын хэсгийн ахлагч Д.Мөнхтуяа ирц, зохион байгуулалтын талаар мэдээлэл өгсний дараа  чуулганд оролцогчид даргалагчаа сонгов. Нийт шүүгчийн анхдугаар чуулганыг даргалагчаар Улсын дээд шүүхийн шүүгч Г.Банзрагчийг сонгогдсон юм.

Чуулганы эхэнд Монгол Улсын Ерөнхийлөгч Ухнаагийн Хүрэлсүх нийт шүүгчдэд хандаж мэндчилгээ дэвшүүллээ. Тэрбээр "Нийгэмд шударга ёсыг тогтоох амаргүй ажлын ачааны хүндийг үүрч байгаа шүүх засаглалыг бэхжүүлж, шүүн таслах ажиллагааг боловсронгуй болгох талаар онцгойлон анхаарахыг өнөөгийн нөхцөл байдал шаардаж байна. Чин шударгаар ажиллаж байгаа шүүгчид, албан хаагчдын үр дүн, нэр төр зарим шүүгчийн гаргасан гэмт хэрэг, ёс зүйгүй, бусармаг үйлдлийн хар сүүдэрт дарагдаж буйд би туйлын харамсаж байна. Төрд зүтгэж буй хэн ч гэсэн төгс сайн мэдлэггүй ч төгөлдөр сайн ёс суртахуунтай байх ёстой гэж сайхан үг байдаг. Шүүгч та төрийн сүлдэндээ тангараг өргөдөг цөөн албан тушаалтны нэг юм. Өргөсөн тангаргаасаа няцвал төрийн хуулийн дагуу хариуцлага хүлээх үүрэг ч таныг дагалдахыг санах ёстой. Шүүх эрх мэдэл бол ядарсан нэгний найдах сүүлчийн зогсоол, задарсныг нь засаглах Монгол төрийн хууль цаазын ташуур юм” гэж онцлов.

 

Ерөнхийлөгч мэндчилгээ дэвшүүлсний дараа шүүгчид чуулганы дэгийн төслийг хэлэлцэж баталлаа.

Шүүхийн тухай хууль (шинэчилсэн найруулга)-д Нийт шүүгчийн чуулганд Шүүхийн ерөнхий зөвлөлийн тайланг сонсохоор заасан. Тиймээс Шүүхийн ерөнхий зөвлөлийн дарга Э.Батбаяр Шүүхийн ерөнхий зөвлөлийн танилцууллаа.

Мөн Улсын дээд шүүхийн Ерөнхий шүүгч Д.Ганзориг Нийт шүүгчийн чуулганд оролцогчдод хандаж үг хэллээ. 

Нийт шүүгчийн анхдугаар чуулганаар Шүүхийн ерөнхий зөвлөл, Сахилгын хороо­ны шүүгч гишүүдийг нууц санал хураалтаар сонгоно. Шүүхийн ерөнхий зөвлөлийн шүүгч гишүүнд анхан шатны шүүхээс зургаа, давж заалдах шатны шүүхээс ес, хяналтын шатны шүүхээс нэг шүүгч, Сахилгын хорооны шүүгч гишүүнд анхан шатны шүүхээс дөрөв, давж заалдах шатны шүүхээс тав, хяналтын шатны шүүхээс нэг шүүгч нэрээ дэвшүүлжээ.

Чуулганаар мөн Хэрэг, нэхэмжлэл, гомдол, хүсэлт хүлээн авах, хуваарилах болон хэрэг, маргааныг хянан шийдвэрлэх шүүгч, шүүх бүрэлдэхүүнийг сугалаагаар томилох нийтлэг журмыг хэлэлцэн батална.

Нийгэмд шударга ёсыг тогтоох амаргүй ажлын ачааны хүндийг үүрч байгаа шүүх засаглалыг бэхжүүлж, шүүн таслах ажиллагааг боловсронгуй болгох талаар онцгойлон анхаарахыг өнөөгийн нөхцөл байдал шаардаж байна. Чин шударгаар ажиллаж байгаа шүүгчид, албан хаагчдын үр дүн, нэр төр зарим шүүгчийн гаргасан гэмт хэрэг, ёс зүйгүй, бусармаг үйлдлийн хар сүүдэрт дарагдаж буйд би туйлын харамсаж байна. Төрд зүтгэж буй хэн ч гэсэн төгс сайн мэдлэггүй ч төгөлдөр сайн ёс суртахуунтай байх ёстой гэж сайхан үг байдаг. Шүүгч та төрийн сүлдэндээ тангараг өргөдөг цөөн албан тушаалтны нэг юм. Өргөсөн тангаргаасаа няцвал төрийн хуулийн дагуу хариуцлага хүлээх үүрэг ч таныг дагалдахыг санах ёстой. Шүүх эрх мэдэл бол ядарсан нэгний найдах сүүлчийн зогсоол, задарсныг нь засаглах Монгол төрийн хууль цаазын ташуур юм.